Ishyirahamwe ry’Umukino wo Gusiganwa ku Magare mu Rwanda, Ferwacy, ryateguye irushanwa ryo Kwibuka ku nshuro ya 30 Jenoside yakorewe Abatutsi muri Mata 1994, ryiswe ‘Race To Remember 2024.’
Iri rushanwa biteganyijwe ko rizaba ku Cyumweru tariki ya 28 Mata 2024. Rizatumirwamo amakipe yose yo mu Gihugu, yaba abakinnyi n’abayobozi.
Biteganyijwe ko nyuma y’irushanwa, hazaba umuhango wo kunamira imibiri y’Abatutsi iruhukiye mu Rwibutso rwa Nyanza ya Kicukiro ndetse hakazanatangwa ibiganiro bivuga amateka y’uru Rwibutso.
Isiganwa rizaca kuri Canal Olympia – Nemba – Canal Olympia.
Abagabo, ingimbi ndetse n’abatarengeje imyaka 23, bazasiganwa ku ntera ingana n’ibilometero 113 (113 KM).
Abagore, abangavu n’abatarengeje imyaka 23 ndetse n’abatarabigize umwuga, bazasiganwa ku ntera ingana n’ibilometero 71.8 (71.8 KM). Bazahagurukira Canal Olympia, bace i Nyamata mu Mujyi, bagaruke gusoreza kuri Canal Olympia.
Mu 2022, Ingabire Diane ni we wegukanye Race To Remember mu Cyiciro cy’Abagore, mu gihe mu Bagabo yegukanywe na Mugisha Moïse.
Mu mwaka ushize wa 2023, iri rushanwa ryegukanywe na Ngendahayo Jérémie, Cyiciro cy’Abagabo.
HABIMANA SADI/UMUSEKE.RW