Gisagara yatsinzwe na Rukinzo yo mu Burundi amaseti 3-0, uba umukino wa kane wikurikiranya idatsinda kuva irushanwa rya African Club Championship ryatangira tariki ya 14 Mata 2024, ikomeza kurutanga.
Ni umukino wa kane mu itsinda C wabaye kuri uyu wa Gatatu tariki 17 Mata 2024, saa Yine za mu gitondo. Ikipe ya Gisagara VC yaje muri uyu mukino ishaka kureba ko nibura yawutsinda, ikareka gukomeza kugayika.
Ibyifuzo byabo ntibyabahiriye kuko batsinzwe na Rukinzo VC yo mu Burundi amaseti 3-0 (25-23, 25-19, 25-17).
Iyi ntsinzwi ije yiyongera kuyo bagize ku munsi we’ejo ku wa Kabiri, ubwo batsindwaga na Espoir yo muri Repubulika Iharanira Demokarasi ya Congo amaseti 3-2 (23-25, 29-27, 25-23, 19-25, 15-10).
Mu yindi mukino Gisagara VC yatsinzwe, harimo umukino wa mbere bakinnye, aho batsinzwe na Asw Blida Sport ville de Blida yo muri Algérie, amaseti 3-1 (18-25, 25-16, 26-24, 25-15). Umukino wa kabiri bakinnye na wo bakawutsindwa ni uwo bahuyemo na Kenya Prisons amaseti 3-0 (25-11, 25-16, 25-17).
Ku rundi ruhande, Police VC yo yitwaye neza ku wa Kabiri tariki ya 16 Mata, itsinda University of Zimbabwe Wolves yo muri Zimbabwe amaseti 3-0 (26-24, 25-22, 25-24), umukino wabaye saa Sita z’amanywa.
Iyi ntsinzi yaje yiyongera ku yandi manota babonye ku mukino wabo wa kabiri bateyemo mpaga ikipe ya Volleyball Club Garde Republicaine yo muri Repubulika Iharanira Demokarasi ya Congo nyuma y’aho iburiye ku kibuga.
Kuri wa Gatatu tariki ya 17 Mata, ikipe y’Igipolisi cy’u Rwanda nta mukino yakinnye, yararuhutse.
Kuri wa Kane tariki 18 Mata, imikino irakomeza. Police VC irakina na Green Buffaloes yo muri Zambia, saa Sita z’amanywa, mu gihe Gisagara VC iza gukina na Porte Autonome de Douala yo muri Cameron, saa Saba z’amanywa.
- Advertisement -
ISHIMWE YARAKOZE SETH KEFA/UMUSEKE.RW