Mu byaranze imikino y’umunsi wa Gatatu w’irushanwa “Pre-Season Agaciro Tournament”, harimo kubona inota rimwe kuri Brésil & Friends ikinamo abiganjemo abavuka mu Karere ka Rubavu.
Imikino y’uyu munsi yatangiye Saa saba z’amanywa, ibera kuri Kigali Pelé Stadium.
Ikipe ya Travel Agency Line FC ntiyahiriwe kuko yatsinzwe na Kimonyi FC igitego 1-0.
Ibi byatumye iyi kipe y’i Musanze ndetse iyoborwa na Perezida wa Musanze FC, itangira neza iri rushanwa nyuma yo kubona amanota atatu imbumbe.
Undi mukino wakurikiyeho Saa Cyenda z’amanywa, ni uwahuje Brésil & Friends FC y’abavuka i Rubavu na Football DNA FC y’abavuka ku Mumena.
Izi zombi zaje kugwa miswi nyuma yo kunganya igitego 1-1. Byatumye Kimonyi FC iyobora iri tsinda n’amanota atatu yuzuye.
Imikino ibiri yabaye ku wa Kabiri tariki ya 28 Gicurasi, yasinze ikipe zose ziguye miswi.
Étoile Filante FC yanganyije na Ramjaane Foundation ibitego 2-2, mu gihe na T.Rwanda yanganyije na Ubumwe Grande Hotel ibitego 2-2.
Ni ku nshuro ya Gatatu hari gukinwa irushanwa rya “Pre-Season Agaciro Tournament.” Umwaka ushize, ryegukanywe na Gatoto FC.
- Advertisement -
UMUSEKE.RW