Impuzamashyirahamwe y’Umupira w’Amaguru ku Mugabane w’i Burayi, UEFA, yahembye rutahizamu ukomoka muri Portugal, Cristiano Ronaldo ku bwo gutsinda ibitego byinshi mu marushanwa y’i Burayi.
Ku wa Kane tariki ya 29 Kanama 2024, ni bwo habaye tombola y’uko amakipe azahura mu marushanwa ategurwa na UEFA arimo UEFA Champions League, UEFA Europa League na UEFA Conference League.
Ni umuhango wabereye mu Bufaransa mu Mujyi wa Monaco, uyoborwa na Aleksander Čeferin uyobora UEFA.
Muri uyu muhango, ni na ho hahise hahembwa kizigenza Cristiano Ronaldo ku bwo kuba ari we watsinze ibitego byinshi mu irushanwa rya UEFA Champions League rihuza amakipe yabaye aya mbere iwayo i Burayi.
Uyu munya-Portugal, yatsinze ibitego 140 mu mikino 183. Yegukanye ibikombe bitanu bya UEFA Champions League.
Impamvu yo kumuhemba, ni uko kugeza ubwo hahindurwaga uburyo iri rushanwa rigiye kujya rikinwa, nta wundi mukinnyi umurusha ibitego yaba mu bamubanjirije kurikina n’abagikina ubu.
Aka gahigo yakoze, CR7 yagakoreye mu makipe yaciyemo arimo Sporting Club de Portugal y’iwabo, Manchester United, Real Madrid na Juventus. Aha hose yahatsinze ibitego 140 mu mikino 183 yakinnye muri UEFA Champions League.
Arusha Lionel Messi ibitego 11 kuko uyu Munya-Argentine amaze gutsinda 129, mu gihe Robert Lewandowski wa Gatatu, amaze gutsinda ibitego 94.
Cristiano kandi, yihariye agahigo ko kuba ari we mukinnyi watsinze ibitego byinshi mu mikino ikurikirana (11) kuva muri Kamena 2017 kugeza muri Mata 2018. Aha yahatsinze ibitego bitatu muri buri mukino yakinnye (Hat-tricks).
- Advertisement -
Ku rwego rw’amarushanwa y’ikipe y’Igihugu mu marushanwa ya UEFA, CR7 amaze gutsinda ibitego 130 mu mikino 212.
Ibikombe bitanu bya UEFA Champions League yegukanye, uyu mukinnyi yabyegukanye mu myaka ya 2008, 2014, 2016, 2017 na 2018.
Umwaka w’imikino yatsinzemo ibitego byinshi muri UCL, ni 2013-14 ubwo yatsindaga 17.
UMUSEKE.RW