Ishyirahamwe ry’Umupira w’Amaguru mu gihugu cy’u Burundi, ryemeje ko Sangwa Mayani Patrick ari we mutoza w’ikipe y’Igihugu y’u Burundi (Intamba mu Rugamba) asimbuye Ndayiragije Étienne.
Ku wa kane tariki ya 24 Ukwakira 2024, ni bwo Ishyirahamwe ry’Umupira w’Amaguru i Burundi [FFB], ryemeje ko biciye mu bwumvikane bw’impande zombi, Ndayiragije Étienne atakiri umutoza w’ikipe y’Igihugu y’u Burundi (Intamba mu Rugamba) nyuma y’umwaka umwe n’amezi icyenda yari amaze muri izi nshingano.
Nta bwo bigeze batinda gushaka igisubizo, kuko FFB ibicishije kuri X y’iri shyirahamwe, yemeje ko Sangwa Mayani Patrick ari we wahawe akazi ko gutoza Intamba mu Rugamba. Uyu mutoza afite umukoro wo gufasha Igihugu cye kubona itike yo kuzanina CHAN 2024 izakinwa mu 2025.
Sangwa yahoze ari umwungiriza wa Ndayiragije mu mwaka ushize. Ni umutoza usanzwe uzwi i Burundi kuko yatoje amakipe arimo Rumuri, Athlètico Olympic na Flamengo. Yagiye ashingwa inshingano zitandukanye zijyanye n’umupira w’amaguru iwabo.
UMUSEKE.RW