Nyuma yo gukurikiranywaho ibyaha bitatu birimo icyo gukangisha gusebanya ndetse agakwirakwiza amafoto y’ubwambure bw’uwo bahoze bakundana, Nshimiyimana Marc Govin ukinira Gasogi United, yakatiwe igifungo gisubitse anacibwa ihazabu ya miliyoni 1 Frw.
Tariki ya 23 Nzeri 2024, ni bwo Urwego rw’Igihugu rw’Ubugenzacyaha, RIB, rwataye muri yombi Nshimiyimana Marc Govin wakiniraga Gasogi United mu gice cy’ubwugarizi.
Uyu musore w’imyaka 24, yari akurikiranyweho ibyaha bitatu. Muri byo harimo Gukangisha gusebanya, kubuza amahwemo hakoreshejwe mudasobwa no gushyira ahagaragara amashusho yerekanye imikoreshereze y’ibitsina hakoreshejwe mudasobwa cyangwa urusobe rwa mudasobwa.
Nyuma yo gutabwa muri yombi na RIB, dosiye ye yoherejwe mu Bushinjacyaha, maze abazwa kuri ibi byaha.
Ku wa Mbere tariki ya 14 Ukwakira 2024, ni bwo Nshimiyimana Marc Govin yagejwe imbere y’Urukiko rw’Ibanze rwa Kicukiro aburana ku byaha yari akurikiranyweho.
Urukiko rwemeje ko uyu myugariro ahamwa n’icyaha cyo gushyira ahagaragara amashusho yerekanye imikoreshereze y’ibitsina hakoreshejwe mudasobwa cyangwa urusobe rwa mudasobwa.
Nshimiyimana yahise ahanishwa igifungo cy’amezi atandatu asubitse mu gihe cy’imyaka itatu no gutanga ihazabu ya miliyoni 1 Frw.
Yategetswe kandi kwishyura amagarama y’urubanza angana n’ibihumbi 10 Frw bitarenze amezi atanu.
Uyu mukinnyi yakoze ibi byaha mu bihe bitandukanye nyuma y’uko yari amaze gutandukana n’uwo bakundanaga. Hari amafoto y’umukunzi we yafashe agaragaza ubwambure bwe, nyuma yo gutandukana akamukangisha kuyashyira hanze kugira ngo bagumane.
- Advertisement -
Nyuma yo kwanga ko bakomeza gukundana, uyu musore yahise atangira kuyakwirakwiza mu rwego rwo kwihimura.
Marc Govin yaciye mu makipe arimo Intare FC, AS Kigali, Mukura VS na Gasogi United yakiniye mu mwaka ushize w’imikino 2023-24 ndetse akaba akiyirimo.
UMUSEKE.RW