Nyuma y’uko hasohotse amakuru ashinja ikipe ya Rayon Sports ko yaba yararangaye ntiyiyandikishe mu makipe azakina irushanwa ry’Igikombe cy’Amahoro, iyi kipe yahakanye yivuye inyuma aya makuru ndetse igaragaza ibimenyetso by’uko yiyandikishije kandi ku gihe.
Tariki ntarengwa yo kurangiza kwiyandikisha ku makipe azakina irushanwa ry’Igikombe cy’Amahoro, yari tariki ya 5 Ugushyingo 2024. Nyuma y’iyi tariki, hahise hasohoka amakuru avuga ko ikipe ya Rayon Sports yaba itarayindikishije mu zizakina iri rushanwa.
Kuri uyu wa Gatatu ni bwo Gikundiro yagaragaje Email igaragaza ko tariki ya 28 Ukwakira 2024, ari bwo yandikiye Ishyirahamwe ry’Umupira w’Amaguru mu Rwanda, Ferwafa, isaba kuzakina irushanwa ry’Igikombe cy’Amahoro muri uyu mwaka. Iyi baruwa kandi yaherekejwe n’icyemeza ko yishyuye amafaranga asabwa ngo ikipe yemererwe gukina iri rushanwa.
Ibi birasobanura neza ko iyi kipe itemeranya n’ayo makuru avuga ko yaba yararangaye ntiyiyandikishe.
UMUSEKE.RW