Ikipe y’umupira w’amaguru y’Abanyamakuru b’Imikino mu Rwanda (AJSPOR FC), yatsinze iy’Abanyarwanda batuye muri Australia, ibitego 2-1, iba intsinzi ifungura umwaka wa 2025.
Ni umukino wa gicuti wabaye ku wa Gatanu tariki ya 3 Mutarama 2025 Saa Cyenda z’amanywa kuri Kigali Péle Stadium.
Abarimo Umuyobozi w’Inama y’Ubutegetsi y’Urwego rw’Abanyamakuru Bigenzura (RMC), Mutesi Scovia, bari mu banyacyubahiro bitabiriye uyu mukino.
Uretse uyu Muyobozi kandi, hari n’abanyamakuru bari baje gushyigikira bagenzi ba bo, ari na ko bihera ijisho uyu mukino waryoheye abawurebye.
Ibitego bya Munyantore Eric (Khalikeza) ukorera Inyarwanda na Bigirimana Ismail Christian ukorera Voice of Africa, ni byo byahesheje AJSPOR FC intsinzi y’ibitego 2-1.
Aya makipe yombi amaze kubaka umubano watangiye muri Mutarama 2024. Umukino ubanza wakinwe muri Mutarama 2024 na bwo AJSPOR yatsinze ibitego 3-2.
UMUSEKE.RW