Mu mukino wa ½ w’irushanwa ry’Igikombe cy’Intwari cy’uyu mwaka, ikipe ya Police FC yatsinze Rayon Sports kuri penaliti 3-1, iyiha ubutumwa ko ruhago idakinirwa mu magambo nyuma y’uko Umuvugizi wa yo yari yemeje ko nta kizababuza kugera ku mukino wea nyuma.
Kuri uyu kabiri ni bwo hakinwe imikino ibiri ya ½ y’irushanwa ry’Igikombe cy’Intwari. Ni imikino yabereye kuri Kigali Pelé Stadium guhera Saa cyenda z’amanywa. APR FC na AS Kigali, ni zo zabimburiye izindi, maze ikipe y’Ingabo isezerera iterwa inkunga n’Umujyi wa Kigali nyuma yo kuyitsinda ibitego 2-0 byatsinzwe na Denis Omedi kuri penali na Niyibizi Ramadhan wagitsinze ku mupira uteretse.
Saa Kumi n’Ebyiri z’ijoro, hahise hakurikira umukino wahuje Rayon Sports na Police FC. Abakunzi benshi b’ikipe ya APR FC, bari bahisemo gushyigikira ikipe y’Abashinzwe Umutekano, mu gihe Aba-Rayons nk’ibisanzwe, bari baje ku bwinshi gushyigikira ikipe bihebeye.
Umukino watangiye hari kugwa imvura nke iringaniye, ariko utihuta, cyane ko kuri buri ruhande hari abakinnyi basanzwe babanzamo, batarimo uyu munsi. Ku ruhande rwa Gikundiro, Aziz-Bassane, Ndayishimiye Richard ukina hagati mu kibuga, bari babanje ku ntebe y’abasimbura.
Ku munota wa 17 w’umukino, Rayon Sports yabonye igitego yahawemo impano n’umunyezamu wa Police FC, Niyongira Patience nyuma y’umupira muremure wari uturutse kuri Khadime wari uhagaze mu izamu rya Gikundiro, maze Ishimwe Christian na Niyongira barawusiganira, Iraguha Hadji ahita awushyira mu rushundura, igitego kiboneka uko.
Gusa iyi kipe itozwa na Mashami Vincent, nta bwo yigeze icika intege, cyane ko igitego yari itsinzwe, kitari icyo uwo bakinaga yakoreye ahubwo cyari gitewe n’uburangare.
Aba basore ntibacitse intege, kugeza ubwo ku munota wa 45+3, haterwaga koruneri yatsinzwe neza na Henry Msanga n’umutwe maze igice cya mbere kirangira amakipe yombi aganyije igitego 1-1. Aba-Rayons bari baje kureba uyu mukino, bahise babona ko amazi atari yayandi.
Gikundiro itozwa na Roberto Oliviera uzwi nka Robertinho, yagarutse mu gice cya kabiri ikora impinduka, ikuramo Kanamugire Roger na Adama Bagayoko, basimburwa na Ndayishimiye Richard na Aziz-Bassane. Zari impinduka zari zigamije guha ituze iyi kipe hagati mu kibuga ariko kandi ishaka ibisubizo mu kwihutisha imipira iciye ku mpande.
Ibi ntibyakanze abasore ba Kacyiru, kuko bo ahubwo bagarutse mu gice cya kabiri bari hejuru kurusha uko bakinnye igice cya mbere. Bagarutse mu gice cya kabiri, bagaragaza inyota yo kubona igitego cya kabiri kurusha ikipe yo mu Nzove.
- Advertisement -
Aha ni ho bamwe mu ba-Rayons, bahise bibaza niba ikipe bihebeye mu gihe idafite kapiteni wa yo, Muhire Kevin, ubuzima buzajya buhagarara, cyane ko kubona undi watanga umupira uvamo igitego, byari byakomeje kuba ingorabahizi.
Ikipe y’Igipolisi, yahise imera nk’igiye gucumbika ku izamu rya Rayon Sports, mu gihe ibonye umupira igahita iwihutisha iwucishije kwa Bassane na we utabaye mwiza kuri uyu munsi. Ku munota wa 77 ni bwo haje kidobya witwa Khadime Ndi’aye, weretswe ikarita itukura na Nsabimana Céléstin nyuma yo gufata umupira akawureka ahuwbo akajya kuniga Byiringiro Lague, yavugaga ko ari we wabanje kumukorera ikosa.
Rayon Sports yahise ikuramo Iraguha Hadji wahise asimburwa n’umunyezamu, Ndikuriyo Patient wari ukinnye umukino we wa mbere muri iyi kipe kuva mu Amagaju FC. Ikipe itozwa na Mashami nta bwo yabashije kubyaza umusaruro ku kuba bari benshi ndetse iminota 90 irangira amakipe yombi aguye miswi nyuma yo kunganya igitego 1-1.
Icyari gikurikiyeho, ni ugutera penaliti nk’uko amategeko y’iri rushanwa abivuga. Muhadjiri Hakizimana wari wagiye mu kibuga asimbuye ku ruhande rwa Police FC, ni we wabimburiye bagenzi gutera ariko ayitera inyoni.
Hakurikiyeho myugariro wa Gikundiro, Youssou Diagne, na we wahise awuha Niyongira mu biganza. Hakurikiyeho Ani Elijah maze ayitsinda neza, hahita haza gutera Serumogo Ally nawe wayiteye neza. Hahise hajya gutera Mugisha Didier, maze ayinjiza neza.
Ibara ryabaye ubwo Omar Gning wa Rayon Sports, ubwo we na Aziz-Bassane bahushaga penaliti, umukino urangira intsinzi itashye mu Nzove ku ntsinzi ya penaliti 3-1 nyuma yo kuganya igitego 1-1.
Umukino wa nyuma uzahuza ikipe y’Igipolisi izacakirana na APR FC muri deryb y’Umutekano, ku wa gatandatu tariki ya 1 Gashyantare 2025 kuri Stade Amahoro. Ni amakipe ahuriye ku mukino wa nyuma inshuro ebyiri zikurikiranya muri iri rushanwa.
UMUSEKE.RW