Ubuyobozi bw’ikipe ya La Jeunesse FC yo mu cyiciro cya Kabiri, bushobora kujyana Bugesera FC mu nkiko za Siporo z’Ishyirahamwe ry’Umupira w’Amaguru mu Rwanda (Ferwafa), kubera gusinyisha umukinnyi, Dushimimana Eric hatabayeho ubwimvikane bw’impande zombi.
Ku wa 28 Mutarama 2025, ni bwo ibicishije ku rukuta rwa yo rwa X yahoze yitwa Twitter, Bugesera FC yemeje ko yasinyishije Dushimimana Eric yakuye muri La Jeunesse FC ikina muri shampiyona y’icyiciro cya kabiri. Uyu musore ukina mu gice cy’ubusatirizi, ubuyobozi bw’ikipe yavuyemo, buvuga ko yagiye gusinya aya masezerano butabizi.
Umwe mu bahaye amakuru UMUSEKE, yagize ati “Nagiye kubona mbona baramwerekanye nk’umukinnyi wa bo mushya. Twe nk’ubuyobozi ntacyo tubiziho. Dutegereje kubona bamusabira ibyangombwa muri Ferwafa, ubundi natwe tukabarega.”
Twifuje kumenya icyo ubuyobozi bwa Bugesera FC buvuga kuri aya makuru yo gusinyisha uyu mukinnyi mu buryo butemewe, ariko Perezida wa yo, Gahigi Jean Claude ntiyabasha kwitaba telefone ye igendanwa ndetse ntiyabasha gusubiza ubutumwa bugufi twamwandikiye.
Eric ni umwe mu bakinnyi beza bari mu cyiciro cya kabiri kuko yahavuye amaze gutsinda ibitego icyenda. Yaje muri La Jeunesse FC avuye muri Umuri Foundation ikina muri shampiyona y’Icyiciro cya Gatatu.
UMUSEKE.RW