Bitewe n’ibibazo by’ibihano ikipe ya Kiyovu Sports yafatiwe na FIFA, yahisemo gutizwa abakinnyi bo mu Intare FC ikina muri shampiyona y’icyiciro cya Kabiri, barimo uwa Nyakwigendera, Patrick Mafisango.
Urucaca rwagize ibibazo kuva uyu mwaka w’imikino 2024-25 watangira, rubuzwa kugira abakinnyi rwinjiza kugeza muri Kamena uyu mwaka, kubera ibihano rwafatiwe n’Ishyirahamwe mpuzamahanga ry’Umupira w’Amaguru ku Isi, FIFA, kubera abakinnyi barureze kubirukana binyuranyije n’amategeko.
Ibi byagize ingaruka mbi kuri iyi kipe yo ku Mumena, ndetse ubu ni yo iri ku mwanya wa nyuma n’amanota 12 n’umwenda w’ibitego 16. Nyuma yo gusoza imikino ibanza iri mu makipe abiri ya nyuma ashobora kujya mu cyiciro cya kabiri, Kiyovu Sports yigiriye inama yo gutira mu Intare FC abato bashobora kongerera imbaraga abahari.
Aba barimo umuhungu wa Patrick Mafisango, Tabu Crespo ukina hagati ajyana imipira imbere n’ubundi wazamukiye muri iyi kipe, Niyo David na we ukina hagati mu kibuga, Shema Thierry, Uwineza Rene ukina mu gice cy’ubusatirizi aca ku ruhande na Dusengumuremyi Bertrand ukina mu bugarira ku ruhande rw’ibumoso.
Aba baraza biyongera ku bandi bakinnyi bato iyi kipe ikomeje guha amahirwe na Mutunzi ukina mu busatirizi, Erisa n’abandi bakina mu kipe nto ya Kiyovu Sports.
UMUSEKE.RW