Ikipe ihagarariye u Rwanda mu marushanwa Nyafurika y’amakipe yabaye aya Mbere muri Volleyball, Gisagara Volleyball Club, yatangiye neza itsinda umukino wa Mbere muri iri rushanwa.
Guhera tariki 5 Gicurasi, mu gihugu cya Tunisia hari kubera irushanwa Nyafurika rihuza amakipe yabaye aya Mbere iwayo mu mukino wa Volleyball [Men’s African Volleyball club Championship].
Ikipe ya Gisagara Volleyball Club ihagarariye u Rwanda muri iri rushanwa, yatangiye neza itsinda umukino wa Mbere, Port de Douala yo muri Cameroun amaseti atatu kuri imwe [3-1]. Uyu mukino wabaye ku Cyumweru tariki 8 Gicurasi.
Iyi kipe ihagarariye Abanyarwanda muri Tunisia, biteganyijwe ko kuri uyu wa Mbere Saa Kumi n’ebyiri za nimugoroba z’i Kigali, ikina umukino wa Kabiri na Equity Bank VC yo muri Kenya.
Indi mikino yabaye ku Cyumweru tariki 8 Gicurasi, ni Customs Services yo muri Nigeria yatsinze Equity Bank VC amaseti atatu ku busa [3-0], AS Douanes y’i Burundi yatsinze Wolaitta Dicha Sports yo muri Éthiopia amaseti atatu [3-0], Kenya Ports Authority yo muri Kenya yatsinze Madda yo muri Éthiopia amaseti atatu kuri abiri [3-2]. Hari n’izindi zakinnye zirimo Al Ahly yo mu Misiri yitwaye neza ibona intsinzi imbere ya Club Olympique de Kelibia yo muri Tunisia.
Ésperance yo muri Tunisi, ni yo ibitse iki gikombe.
HABIMANA SADI/UMUSEKE.RW