Emmanuel Arnold Okwi yafashije ikipe ya Kiyovu Sports kubona amanota atatu yakuye kuri APR FC.
Wari umukino wabanje kuvugwamo kwikanga ibisa n’amarozi ukurikije uburyo Stade yabanje gucungirwa umutekano.
Uyu mukino wasifuwe n’abasifuzi babiri mpuzamahanga bari bayobowe na Ishimwe Claude na Karangwa Justin wari umwungiriza wa Mbere, wari urimo guhangana n’amahane menshi.
Ikipe ya Kiyovu Sports yatangiye idashaka gusanga APR FC mu kibuga cyayo, igategereza imipira iyisanga iwayo, ariko uko iminota yicuma ni ko umukino warushagaho kuzamo imbaraga.
Hakiri kare, Kiyovu Sports yabonye penaliti ku munota wa 15 yakorewe Emmanuel Arnold watezwe na Nsabimana Aimable.
Iyi penaliti yahise yinjizwa neza na Bigirimana Abedi, bituma Kiyovu Sports yongera kuzamura icyizere cyabo.
Bidacyeye Kabiri, ku munota wa 29 Kiyovu Sports yahise ibona igitego cya Kabiri cyatsinzwe na Okwi ku mupira uteretse yerekeje mu izamu ku ikosa ryari rikorewe Muhozi Fred.
APR FC yari yabanje abakinnyi benshi hagati, byakomeje kuyigora ariko ikanyuzamo ikihutisha imipira biciye kuri Mugisha Gilbert na Yannick Bizimana.
Igice cya Mbere cyarangiye Kiyovu Sports iri imbere n’ibitego 2-0.
- Advertisement -
Igice cya Kabiri, cyatangiranye n’impinduka ku ruhande rwa APR FC, yahise ikuramo Mugisha Gilbert na Yannick Bizimana, basimburwa na Mugunga Yves na Nshuti Innocent bari baje kongera imbaraga mu busatirizi bw’iyi kipe.
Izi mpinduka zatumye APR FC isatira, binayihesha igitego ku munota wa 59 cyatsinzwe na Ombolenga Fitina ku mupira waturutse muri koruneri yari itewe na Manishimwe Djabel.
APR FC yahise igarukana Kiyovu Sports, iyisanga mu gice cya yo maze itangira kuyikoresha amakosa.
Mu kongera imbaraga, APR yahise ikora impinduka ikuramo Rwabuhihi Placide na Manishimwe Djabel, basimburwa na Anicet na Byiringiro Lague.
Kiyovu Sports nayo yahise ikora impinduka ikuramo Mugenzi Cédric na Muhozi Fred, basimburwa na Mugenzi Bienvenu na Bigirimana Amiss Coutinho.
Kiyovu yakomeje gucunga ibitego byayo, ariko ikanyuzamo igasatira n’ubwo yari yagabanyije imbaraga.
Impinduka za APR zatumye ikomeza gusatira, ariko Urucaca rwari ruhagaze bwuma mu bwugarizi bwarwo.
Kiyovu yongeye gukora impinduka, ikuramo Muzamiru Mutyaba asimburwa na Ishimwe Saleh.
Kiyovu Sports yakomeje gucunga ibitego byayo, iminota 90 irangira yegukanye intsinzi ku bitego 2-1.
Ibi byatumye izi kipe zombi zinganya amanota [60], ariko APR FC igumana umwanya wa Mbere ku kinyuranyo cy’ibitego bibiri.
Ababanjemo ku mpande zombi:
APR XI: Ishimwe Pierre, Ombolenga Fitina, Niyomugabo Claude, Buregeya Prince, Nsabimana Aimable, Ruboneka Bosco, Rwabuhihi Placide, Mugisha Bonheur, Manishimwe Djabel, Mugisha Gilbert, Bizimana Yannick.
Kiyovu Sports XI: Kimenyi Yves, Serumogo Ally, Iracyadukunda Eric, Nshimirimana Ismaël, Ndayishimiye Thierry, Benedata Janvier, Mugenzi Cédric, Muzamiru Mutyba, Bigirimana Abedi, Muhozi Fred, Emmanuel Arnold Okwi.
Indi mikino yabaye:
▪︎ Bugesera FC 1-4 Gorilla FC
▪︎ Marines FC 4-1 Ètincelles FC
▪︎ Étoile de l’Est FC 3-1 Espoir FC
Imikino iteganyijwe ku Cyumweru:
▪︎Police FC vs Mukura (15h, Stade ya Kigali)
▪︎Rutsiro FC vs AS Kigali FC (15h, Stade Umuganda)
▪︎ Gicumbi FC vs Gasogi United (15h, Gicumbi)
▪︎ Musanze FC vs Rayon Sports (15h, Stade Ubworoherane)
HABIMANA SADI/UMUSEKE