Nyuma yo gukurwa ku nshingano zo mu Kigo cy’Igihugu cy’Iterambere, RDB, Niyonkuru Zephanie wabaye umusifuzi mpuzamahanga, yagizwe Umunyamabanga Uhoraho muri Minisiteri ya Siporo asimbuye Shema Maboko Didier wakuwe kuri uwo mwanya.
Ibi byatangarijwe mu myanzuro y’Inama y’Abaminisitiri yabaye ku wa Mbere tariki 30 Mutarama 2023, iyobowe na Perezida Paul Kagame.
Iyi Nama yabereye muri Village Urugwiro, yemeje ko muri Minisiteri ya Siporo hasimburwa abaherukaga gukurwa ku myanya bari bafite.
Uretse Niyonkuru Zephanie wagizwe Umunyamabanga Uhoraho muri Minisiteri ya Siporo, undi wahawe inshingano ni Nshimiyimana Alexis Redamptus wagizwe Umuyobozi Mukuru Ushinzwe Ibikorwaremezo n’Iterambere muri iyi Minisiteri.
Abandi bahawe inshingano, ni Rwego Ngarambe wagizwe Umuyobozi Mukuru Ushinzwe Iterambere rya Siporo, Uwayo Fabrice wagizwe umusesenguzi w’Iterambere rya Siporo [Sports Development analyst] na Nziranziza Mashami Protène ushinzwe gukurikirana Ibikorwaremezo bya Siporo muri iyi Minisiteri.
Zephanie yabaye umusifuzi mpuzamahanga wo ku ruhande, ndetse yanasifuye imikino myinshi yahuje APR FC na Rayon Sports nk’amakipe y’amakeba.
UMUSEKE.RW