Ikipe ya Cercle Sportif de Karongi, yegukanye irushanwa ryo Koga rya Genocide Memorial Swimming Championship 2023 ryo Kwibuka ku nshuro ya 29 Jenoside yakorewe Abatutsi muri Mata 1994.
Ni irushanwa ryateguwe n’Ishyirahamwe Nyarwanda ry’Umukino wo Koga, RSF, ryitabirwa n’amakipe icumi arimo ay’abakobwa n’abahungu.
Iri rushanwa ryabereye muri Green Hills Academy, ryitabiriwe n’abayobozi batandukanye barimo Girimbabazi Rugabira Pamela uyobora RSF, Rwemalika Félicite ubarizwa muri Komite Olempike ku rwego rw’Isi, uwari uhagarariye Minisiteri y’Ubumwe bw’Abanyarwanda n’Inshingano Mboneragihugu n’Umunyamabanga Uhoraho muri Ministeri ya Siporo, Niyonkuru Zéphanie wari umushyitsi mukuru.
Saa tatu z’amanywa ryari ritangiye, amakipe yaryitabiriye yari afite abakinnyi bari mu byiciro bitandukanye uhereye mu bangavu n’ingimbi kugeza mu bakuru.
Ikipe ya Cercle Sportif de Karongi Swimming Club yari ihagarariye Akarere ka Karongi, ni yo yahize izindi ibona umwanya wa mbere ndetse ihembwa umudari wa zahabu n’igikombe.
Mako Sharks Swimming Club ibarizwa muri Green Hills Academy, ni yo yaje ku mwanya wa Kabiri mu gihe Les Dauphins yabonye umwanya wa Gatatu.
Nyuma y’irushanwa, Umunyamabanga Uhoraho muri Minisiteri ya Siporo, Niyonkuru Zéphanie, yashimiye Ishyirahamwe Nyarwanda ry’Umukino wo Koga, RSF, ku bwo gutegura iri rushanwa mu ba mbere ndetse rikaba ryagenze neza.
Yasabye kandi ababarizwa mu isi ya Siporo mu Rwanda, gukomeza kugira uruhare mu Kwibuka Jenoside yakorewe Abatutsi muri Mata 1994 no kurwanya abapfobya n’abahakana Jenoside yakorewe Abatutsi cyane binyuze ku mbuga nkoranyambaga.
Umuyobozi wa RSF, Igirimbabazi Rugabira Pamela, yavuze ko gutegura iri rushanwa ari iby’agaciro kuko nk’Abanyarwanda bagomba gukomeza Kwibuka ku nshuro ya 29 Jenoside yakorewe Abatutsi muri Mata 1994.
- Advertisement -
Uyu muyobozi yavuze ko gusobanurira abakiri bato amateka yaranze Igihugu, ari ngombwa kugira ngo babashe guha agaciro ibikorwa byose byo Kwibuka Jenoside yakorewe mu 1994.
Igirimbabazi yavuze ko ikindi gishimishije kurushaho, ari ubwinshi bw’abakinnyi barenga 120 bitabiriye iri rushanwa.
UMUSEKE.RW