Ubuyobozi bw’abategura “Tujyane Mwami Live Concert” buvuga ko bafashe umwanzuro w’uko kigiye kijya kiba buri gihembwe mu rwego rwo kurushaho gutanga ibyishimo ku bakunzi b’umuziki wo kuramya no guhimbaza Imana.
Abazajya bitabira iki gitaramo cyiswe “Tujyane Mwami Live Concert” bazajya basangira amafunguro atandukanye ibintu bitari bisanzwe bimenyerewe mu Rwanda.
Bamwe mu babashije kwitabira iki gitaramo ku nshuro ya mbere ku wa 24 Nzeri 2023 muri Dove Hotel banyuzwe n’imitegurire yacyo yo ku rwego rwo hejuru.
Kwinjira muri iki gitaramo cyari giteye amabengeza byari 30,000 Frw ku muntu umwe, 40,000 Frw kuri Couple n’ibihumbi 15 ku munyeshuri.
Iki gitaramo cyasusurukijwe n’abahanzi bakunzwe mu muziki wo kuramya Imana barimo Josh Ishimwe, James na Danielle, Danny Mutabazi, True Promises na Musinga Joe.
Agasaro Tracy na Issa Noel batanze umukoro ku bashyushyarugamba basanzwe bayobora ibitaramo bya Gospel mu Rwanda.
Ibyamamare mu muziki Nyarwanda nka Munyanshoza Dieudonne, Aline Gahongayire, Nice Ndatabaye n’abandi benshi baje gushyigikira aba baramyi.
Umuyobozi wa K Square itegura “Tujyane Mwami Live Concert”, Bwana Kabiru Wamiti, yavuze ko bagamije guteza imbere umuziki wo kuramya no guhimbaza Imana.
Yagize ati “Turabakiriye muri edition ya mbere ya Tujyane Mwami Live Concert, reka twishimire urukundo rw’Imana”.
- Advertisement -
Uretse kumva ijambo ry’Imana, kuyiramya no kuyihimbaza ndetse no gusangira amafunguro, K Square bafashije abanyeshuri babiri badafite ubushobozi, ibemerera kuzabishyurira amafaranga y’ishuri.
Ni igikorwa cyakoze ku mitima y’abitabiriye iki gitaramo byitezwe ko kizajya kiba buri gihembwe uko “Tujyane Mwami Live Concert” ibaye.
Hatangijwe n’umushinga uzakorwa na True Promises Ministriy ku bufatanye na K Square wo gufasha abana 25 batishoboye.
Uyu mushinga wiswe “True Promises Open Air Companies” ushaka gutanga ubufasha bwo gufasha abo bana yabunyuza kuri Code *182*8*1*035226# .
NDEKEZI JOHNSON / UMUSEKE.RW