Premier League: I Manchester bagaritswe, Arsenal inyagira Bournemouth

Kuri uyu wa Gatandatu tariki 30 Nzeri 2023 mu gihugu cy’u Bwongereza ku isaha ya Saa Kumi n’imwe hakinwaga imikino y’umunsi wa 7, ni imikino yari itegerejwe na benshi bashaka kureba niba ikipe ya Manchester United yongera kwitwara neza nyuma y’uko yari imaze imikino 2 itsinda yikurikiranya.

Manchester United yari yakiriye Crystal Palace kuri Old Trafford yatsinzwe 1-0 byaherukaga gukina muri Carabao Cup.

Manchester United yaje gutsindwa igitego ku munota wa 26 cyatsinzwe na Andersen wa Crystal Palace, iki gitego ni nacyo cyaranze umukino wose, Manchester United iba itsinzwe umukino wa kane muri uyu mwaka wa Premier League.

Manchester City nayo yari yagiye ku kibuga cya Wolverhampton Wanders, Molineux Stadium, Manchester City yatangiye yitsinda igitego cyitsinzwe na Ruben Dias mu munota wa 13.

Mu gice cya kabiri cy’umukino ikipe ya Manchester yabonye igitego cyo kwishyura cyatsinzwe na Julian Alvarez kuri kufura.

Ikipe ya Wolves yari mu rugo yaje gutsinda igitego cya kabiri cyatsinzwe n’Umunya-Korea Hee Chan Hwang ahawe umupira na Matheus cunha.

Umukino warangiye ikipe ya Manchester City itsinzwe ibitego bibiri kuri kimwe.

Ku isaha ya Saa Kumi z’umugoroba, ikipe ya Arsenal yari yasuye ikipe ya Bournemouth kuri Vitality Stadium.

Arsenal yaje gutsinda ibitego 4 ku busa harimo icyatsinzwe na Bukayo Saka ku munota wa 17, Martin Ødegaard ku munota wa 44, icya gatatu gitsindwa na Kai Havertz ku munota wa 53, mu gihe icya kane cyatsinzwe na Ben White ku munota wa 90+3.

Indi mikino yakinwe ku isaha ya Saa Kumi z’umugoroba:

Ikipe ya Everton yatsinzwe na Luton Town ibitego bibiri kuri kimwe mu gihe ikipe ya Newcastle United yatsinze Burnely ibitego bibiri ku busa.

West Ham United yatsinze Sheffield United ibitego bibiri ku busa.

Umukino wari wakinwe saa Munani n’igice, ikipe ya Aston Villa yatsinze ikipe ya Brighton and Hove Albion ibitego 6-1.