Ikipe ya APR Handball Club yerekeje i Oran muri Algérie, mu irushanwa rihuza amakipe yatwaye ibikombe by’igihugu iwa yo [Cup Winners Cup] rizakinwa kuva tariki ya 18-27 Mata 2024.
Mu rukerera rwo kuri uyu wa Gatatu tariki 17 Mata 2024, nibwo APR HC y’abakinnyi 14 yafashe rutemikirere yerekeza i Oran muri Algerie, ahazabera iyi mikino izaba ikinwa ku nshuro yayo ya 40.
Iyi mikino y’iri rushanwa, biteganyijwe ko izabera mu nyubako ya Palais de Sports Hamou-Boutlélis, kuva tariki 18 kugeza tariki 27 Mata.
Abakinnyi 14 bajyanye n’ikipe ni Uwayezu Arsene, Ntawuhungakaje Jean Bosco, Tuyishime Zacharie, Mugabo Samuel, Hagenimana Fidèle, Niyonkuru Shaffi, Muhumure Elysee, Muhawenayo Jean Paul, Iragena Emmanuel, Karenzi Yannick, Mbonyinshuti Camalade Gilbert, Musoni Albert, Shumbusho Maliyamungu na Abayisenga Roger.
Mu bandi bajyanye n’ikipe harimo Capt. (Rtd) Anaclet Gatete, Umutoza Mukuru Bagirishya Anaclet ndetse n’umutoza wungirije Munyangondo JMV.
Ikipe y’Ingabo z’igihugu iri mu itsina C hamwe n’amakipe nka JSK yo muri Repubulika Iharanira Demokarasi ya Congo na HBCEB yo muri Algerie.
Mu yandi matsinda agize iri rushanwa harimo itsinda A ririmo amakipe nka Al Ahly yo mu Misiri, JSES yo muri Algerie na ESAT yo muri Algerie na yo.
Itsinda B ririmo Red Star yo muri Côte d’Ivoire, OMA yo muri Algerie na Caiman yo muri Congo Brazzaville.
Itsinda D ryo ririmo Zamalek yo mu Misiri, Esperance yo muri Tunisia na BMC yo muri Congo Brazzaville.
- Advertisement -
Umutoza mukuru wa APR, Bagirishya Anaclet, yatangaje intego zibajyanye mu irushanwa agira ati “Tugiye gukotana, duhangane kugira ngo tubone intsinzi. Abakinnyi bameze neza nta kibazo, imyitozo twayikoze neza kandi twari tunamaze iminsi dukina shampiyona ku buryo tutavuga ko abakinnyi batari bafite ‘forme’. Ikindi ni abakinnyi bafite ‘experience’ kuko abenshi muri bo, abagera nko ku munani bari bari mu ikipe y’igihugu yari mu Gikombe cya Africa, i Cairo mu Misiri.”
Umutoza Bagirishya kandi yavuze ko bagiye kumurika abakinnyi b’Abanyarwanda ngo berekane icyo bashoboye, babe babona amakipe akomeye hanze y’igihugu bityo bazafashe ikipe y’igihugu mu Gikombe cya Africa kizabera mu Rwanda mu 2026.
APR HC izakina umukino wa mbere na JSK ku wa Kane tariki ya 18 Mata 2024, saa Yine za mu gitondo.
Umwaka ushize ubwo iri rushanwa ryabaga ku nshuro ya 39, ryegukanwe Zamalek SC yo mu Misiri itsinze Al Ahly ibitego 26-25, mu gihe umwanya wa gatatu wo wegukanwe na Sporting na yo yo mu Misiri itsinze Raja d’Agadir yo muri Maroc ibitego 34-17. Irushanwa ryari ryabereye i Cairo mu Misiri.
ISHIMWE YARAKOZE SETH KEFA/UMUSEKE.RW