Nyuma yo kubona intsinzi mu mikino ya mbere ya nyuma, ikipe ya Police Women Volleyball Club na Kepler Volleyball Club, ziyongereye amahirwe yo kwegukana igikombe cya shampiyona y’uyu mwaka w’imikino.
Imikino ya mbere isoza shampiyona y’Icyiciro cya Mbere muri Volleyball, yabaye ku wa Gatanu tariki ya 24 Gicurasi 2024.
Iyi mikino yagombaga kubera muri Ecole Belge de Kigali, ariko iza kwimurirwa muri Ecole Notre Dame des Anges i Remera.
Yabanjirijwe n’imikino yo guhatanira umwanya wa Gatatu mu byiciro byombi.
Mu Cyiciro cy’Abagore, ikipe ya Rwanda Révenue Authority Women Volleyball Club, yatsinze Ruhango Women Volleyball Club amaseti 3-1 (25-9, 25-14, 24-26, 25-8) ihita inegukana umwanya wa Gatatu.
Mu Cyiciro cy’Abagabo, ikipe ya REG Volleyball Club yatsinze Police Volleyball Club amaseti 3-1 (27-29, 25-17, 25-19, 25-23) ihita inegukana umwanya wa Gatatu.
Hahise hakurikiraho umukino wa mbere mu ya nyuma mu Bagore, maze ikipe ya Police Women Volleyball Club itsinda APR Women Volleyball Club amaseti 3-0.
Iseti ya mbere yarangiye ari 25-12, iya Kabiri irangira kuri 25-17 mu gihe iya Gatatu yarangiye ari 25-18. Ikipe y’Abashinzwe Umutekano ihita yiyongerera amahirwe menshi yo kwegukana igikombe cy’uyu mwaka.
Mu gihe Police WVC yatsinda umukino wa Kabiri w’uyu munsi, yahita yegukana igikombe cya shampiyona. Mu gihe APR yo yawutsinda, hazakinwa undi wa kamarampaka.
- Advertisement -
Mu Bagabo, ikipe ya Kepler VC itozwa na Nyirimana Fidèle, yatsinze APR VC amaseti 3-1.
Iyi kipe ya Kaminuza ya Kepler, yatsinze iseti ya Mbere ku manota 25-14, iya Kabiri iyitsinda kuri 25-18, iya Gatatu iyitsindwa kuri 19-25 mu gihe iya Kane yayitsinze ku manota 25-18.
Imikino ya nyuma ya Kabiri, iteganyijwe kuri uyu wa Gatandatu muri Ecole Notre Dame des Anges i Remera.
UMUSEKE.RW