Rayon Sports yanganyije n’Amagaju FC ibitego 2-2 mu mukino w’Umunsi wa Kabiri wa Shampiyona, uba umukino wa kabiri itakajeho amanota mbere yo gukina na mukeba muri ‘derbie’.
Uyu mukino wabaye kuri uyu wa Gatanu, tariki 23 Kanama 2024, kuri Kigali Péle Stadium, saa Cyenda zirengaho iminota mike.
Umutoza Robertinho utoza Rayon Sports yari yakoze impinduka eshatu mu banyamahanga bifashishijwe kuri uyu mukino ugereranyije n’abakinnye umukino uheruka banganyijemo na Marine FC 0-0, kuko yari yakuyemo Charles Baale, Aruna Madjaliwa ndetse Khadim N’diaye wari ku ntebe y’abasimbira ubushize.
Rukundo Abdoul Rahman waguzwe muri iyi kipe bari bahanganye, Aziz Bassane wakinaga umukino we wa mbere na Adama Bagayogo wabanje hanze ni bo banyamahanga bashya bari bakoreshejwe.
Igice cya mbere cy’umukino cyihariwe n’ikipe ya Rayon Sports. Nko mu minota 20 ya mbere y’umukino, iyi kipe ikomoka i Nyanza yari imaze kubona uburyo butatu imbere y’izamu, ariko ubu buryo ntibwashyirwa mu izamu na Ishimwe Fiston, Elenga Kanga na Rukundo Abdoul Rahman babubonye.
Amagaju na yo yanyuzagamo agakomanga ku izamu ryari ririnzwe na Ndikuriyo Patient wabakiniraga umwaka ushize, gusa ntibabashe kumuhindukiza.
Mbere y’uko bajya kuruhuka, mu minota y’inyongera ni bwo Rayon Sports yahagurukije abakunzi bayo, batari benshi, bari baje kuyishyigikira. Ni igitego cyatsinzwe na Nsabimana Aimable n’umutwe, ku mupira wari uvuye muri koruneri yari itewe na Kapiteni Muhire Kevin.
Murera yaje mu gice cya kabiri ishaka igitego cya kabiri kugira ngo yizere umutekano w’amanota atatu. Ibi ni na byo byatumye ku munota wa 65 ikora impinduka, Rukundo Abdul Rahman aha umwanya Adama Bagayogo.
Ku ruhande rw’Amagaju na ho Umutoza Amaris yakoze impinduka zitandukanye ngo arebe uko yabona igitego cyo kugombora. Izi mpinduka zaje kumubyarira inyungu kuko ku munota wa 72 Amagaju FC yabonye igitego cyatsinzwe na Richard Mapoli Kevin wari umaze umwanya muto yinjiye mu kibuga.
- Advertisement -
Mu kurushaho gushaka igitego cy’intsinzi Rayon Sports yongeye gushyiramo amaraso mashya, ikuramo Aziz Bassane utigaragaje cyane nk’uko yari yitezwe ndetse na Elanga-Kanga bahaye umwanya Sindi Paul Jesus na Iraguha Hadji.
Aba-Rayons bari batangiye kwiheba no gutakaza icyizere cyo gucyura intsinzi baje kumwenyuzwa na Adama Bagayogo umaze kwigarurira imitima ya benshi muri bo. Uyu musore ukiri muto yatsindiye iyi kipe ku munota wa 86 bivuye ku mupira yari atereye inyuma y’urubuga rw’amahina.
Ku munota wa 90 w’umukino, Kapiteni Masudi Narcisse yaje gukora ikosa rya kabiri ryabyaye indi karita y’umuhondo, maze umusifuzi Uwikunda amwereka ikarita itukura yamusohoye mu kibuga.
Ibyishimo by’abakunzi ba Murera byaje guhindurwa amarira na Iragire Saidi wigeze kubakinira. Uyu myugariro ukomoka i Burundi yatsindiye Amagaju mu minota y’inyongera, bivuye kuri coup franc bari babonye maze ashyira umupira mu nshundura akoresheje umutwe, biba ibitego 2-2.
Abakinnyi 10 b’Amagaju bitwaye kigabo ku minota mike yari isigaye ngo umukino urangire, maze birangira bacyuye inota rimwe.
Gikundiro igize intangiriro mbi za Shampiyona kuko ku manota atandatu yashobokaga yakoreye abiri yonyine. Igiteye impungenge kurushaho ni uko ku Munsi wa Gatatu wa Shampiyona izakira APR FC, ku wa 14 Nzeri 2024, ibituma ishobora gusigara ku manota abiri kuri icyenda mu gihe yaba iwutakaje.
Abakinnyi 11 ba Rayon Sports babanje mu kibuga: Ndikuriyo Patient, Muhire Kevin (C), Nsabimana Aimable, Gning Omar, Omborenga Fitina, Niyonzima Olivier, Ishimwe Fiston, Bassane Aziz, Bugingo Hakim, Rukundo AbdulRahman na Elenga Kanga.
Abakinnyi 11 b’Amagaju FC babanje mu kibuga: Twagirumukiza Clément, Masudi Narcisse, Bizimana Iptihadji, Dusabe Jean Claude, Matumona Wakonda, Tuyishime Emmanuel, Semageni Cyrille, Iragire Saidi, Malanda Destin, Ndayishimiye Eduard na Kika Usen Seraphin.
Mu mukino wabanjirije uyu ku isaha ya saa Sita n’Igice z’amanywa, Gasogi United yatsinze Marine FC igitego 1-0. Iyi ntsinzi yatumye Gasogi United iyobora by’agateganyo urutonde rwa Shampiyona n’amanota abiri kuko yatsindiye i Huye Mukura VS mu mukino wafunguye Shampiyona.
ISHIMWE YARAKOZE SETH KEFA/UMUSEKE.RW