Mu mukino w’umunsi wa 12 wa shampiyona, APR FC na Police FC zanganyije igitego 1-1.
Ku wa Gatatu tariki ya 4 Ukuboza 2024, habaye imikino ibiri y’umunsi wa shampiyona y’Icyiciro cya mbere y’umupira w’amaguru mu Bagabo.
Ikipe y’Ingabo yari yakiriye iy’Abashinzwe Umutekano kuri Kigali Péle Stadium guhera Saa Cyenda z’amanywa. Police FC yaje gukina iheruka gutakaza umukino w’Amagaju FC, mu gihe APR FC yo yaherukaga kubona amanota atatu yakuye kuri AS Kigali.
Ku munota wa 10 gusa, Bigirimana Abedi yari afunguye amazamu ku ikipe y’Abashinzwe Umutekano. Iki gitego cya kare, cyahise kizamura icyizere kuri iyi kipe itozwa na Mashami Vincent.
Gusa nta bwo byasabye iminota myinshi kugira ngo ikipe y’Ingabo ibe igitego cyo kwishyura kuko ku munota wa 14 gusa w’umukino, Aliou Souané yahise atsinda igitego cyiza cyagaruraga APR FC mu mukino.
Nyuma yo kwinjizanya igitego, amakipe yombi yakomeje gucungana kugeza iminota 45 y’igice cya Mbere, yarangiye nta yindi ibonye igitego.
Gusa nyuma gato yo gutsinda igitego cyo kwishyura, APR FC yahushije penaliti yahushijwe na Mamadou Sy ku munota wa 40 nyuma y’ikosa ryakorewe Dushimimana Olivier.
Police FC yagarutse mu minota 45 y’igice cya kabiri, ishaka gutanga APR FC igitego ariko ba myugariro b’ikipe y’Ingabo, bakomeza kuyibera ibamba.
Ni amakipe yacunganye kugeza iminota 90 irangiye yombi aguye miswi akanganya igitego 1-1.
- Advertisement -
Buyatumye ikipe y’Ingabo igira amanota 18 ijya ku mwanya wa Gatanu. Police FC yo yagize amanota 19 ijya ku mwanya wa Kane n’amanota 19 mu mikino 12 imaze gukina.
UMJSEKE.RW