Inama idasanzwe y’Abaminisitiri iriga no ku ngamba nshya zo gukumira ikwirakiwra rya COVID-19

Ibyemezo bijyanye n’ingamba nshya zo kwirinda Covid-19 zaherukaga gufatwa tariki 12 Kamena 2021, icyo gihe itangazo ryavugaga ko ingamba zifashwe zisuzumwa nyuma y’ibyumweru bibiri, ubu inama ibaye mbereho iminsi itanu.

Inama y’Abaminisitiri idasanzwe iriga ku ngingo zitandukanye harimo n’ingamba nshya zo kwirinda Covid-19

Umubare w’abandura Covid-19 muri iyi minsi wakomeje kwiyongera nk’uko bigaragarira mu mibare itangwa na Ministeri y’Ubuzima.

Ubutumwa bwanyujijwe kuri Twitter ya Village Urugwiro buvuga ko kuri iki gicamunsi (tariki 21 Kamena 2021) muri Village Urugwiro, Perezida Kagame ayoboye inama Idasanzwe y’Abaminisitiri yiga ku ngingo zitandukanye zirimo ingamba zo gukomeza kurwanya icyorezo cya Koronavirusi.

Mu ngamba zaherukaga gufatwa harimo gushyiraho ko ingendo zemewe guhera saa kumi za mutondo (04h00 a.m) kugera saa saa tatu z’ijoro (21h00).

Kugabanga umubare w’Abakozi ba Leta bajya gukorera mu biro bakava kuri 50%, hajya hajyayo 30% kandi bakajya basimburana.

Inama y’Abaminitiri iheruka yari yanakuyeho ibirori ibyo ari byo byose bibera mu ngo z’abantu.

Hashize igihe gito, Akarere ka Rubavu kashyizwe mu kato (Guma mu Karere) ndetse hafatwa ingamba zihirariye mu mirenge imwen’imwe y’Uturere twa Gicumbi, Rutsiro, Burera na Nyagatare.

Abanyarwanda bategereje imyanzuro ifatirwa mu Nama y’Abaminisitiri ya none. Bamwe baratinya ko hafatwa imyanzuro ikomeye irimo Guma mu rugo nk’uko byagiye bigenda mu bihe byashize, cyangwa ingendo zihuza Kigali n’Intara zikaba zabuzwa.

Kimwe mu bihugu bituranye n’u Rwanda, (Uganda) giherutse gufata icyemezo cyo gushyiraho Guma mu Rugo kubera ubwiyongere bukabije bwa Virus ya Korona.

- Advertisement -

Mu Cyumweru kimwe gusa abanduye bagera ku 2000, imibare myinshi iri i Rubavu, Kigali na Muhanga.

Imibare yo ku Cyumweru tariki 20 Kamena 2021 igaragaza ko abantu batatu (3) bishwe na Covid-19, ni abagore b’imyaka 75, 54 na 42 baguye i Kigali. Abamaze gupfa bose bagera kuri 382.

Abantu 296 banduye Covid-19 barimo 121 i Kigali, 59 i Rubavu na 21 i Muhanga ndetse na 16 i Rutsiro na 12 i Huye, n’abandi 10 muri Kamonyi. Umubare w’abamaze kwandura bose hamwe ni 30 813 babonetse mu bipimo 1 551 520.

Abavuwe barakira ni 26 704 barimo 126 bashya. Abantu 3 727 barwaye Covid-19 barimo 11 barembye.

Abamaze guhabwa ingingo ari 390 7777 barimo abantu 246,789 bamaze guhabwa doze ya kabiri y’urukingo rwa AstraZeneca, ku Cyumweru hakingiwe 251.