Inzego z’ubuyobozi muri Uganda zemeje umuti wa Covidex ukozwe mu byatsi wakorewe muri iki gihugu nk’umwe mu ishobora guhangana n’icyorezo cya Covid-19 n’izindi ndwara zanduzwa na virusi.
Urwego rushinzwe kugenzura imiti, National Drug Authority (NDA) rwatangaje ko uriya muti wakozwe mu byatsi abavuzi gakondo basanzwe bakoresha mu buvuzi bw’indwara zitandukanye.
Gusa, uruiya rwego ruvuga ko atari umuti nyawo ukiza Covid-19.
Iki kigo cya NDA hari hashize Icyumweru kiburiye abaturage gukoresha uyu muti wa Covidex, kibabwira ko utaremezwa.
Umwarimu witwa, Patrick Ogwang wo kuri Mbarara University of Science and Technology, aho umuti wakorewe, avuga ko ari uwe gusa ngo wageze ku isoko mu buryo butari bwo kuko yari atarawutangaza.
NDA cyatangaje ko umuti wemejwe ku mpamvu z’uko wabanje kugenzurwa, hakaba hari uko abaturage mbere bawizeraga ko ubavura, ndetse ngo hakozwe inyigo kuri wo, kandi uwawukoze yamaze kwemera kureka kuvuga ko uvura cyangwa urinda Covid-19 kandi nta gihamya gifatika ihari.
Uyu muti waraguzwe cyane ku isoko nk’uko BBC dukesha iyi nkuru ibivuga.
Mbere umuti wagurishwaga idolari rimwe gusa, ariko aho muri Uganda hadutse inkubiri ya kabiri y’icyorezo cya COVID-19 igiciro cy’uyu muti kigeze ku madolari $22 (£15).
Hashize igihe gito Uganda ishyizeho gahunda ya Guma mu Rugo kuva mu Ntangiriro za Kamena 2021 kubera umubare munini w’abarwaye Covid-19 bari mu Bitaro.
- Advertisement -
Abantu 850,000 muri Uganda bakingiwe Covid-19, ariko bahereye cyane ku bakora mu rwego rw’ubuzima, abarimu, abakuze ndetse n’abari kwa muganga.
REBA YouTube Channel UMUSEKE TV video nziza nk’iyi. UKORA LIKE SHARE na COMMENT
UMUSEKE.RW
