Minisiteri y’Ubuzima muri Uganda yatangaje ko abazafatwa batubahirije amabwiriza yo kwirinda icyorezo cya Coronavirus cyangwa bari mu bikorwa byabujijwe birimo abakora mu tubari, inzu z’utubyiniro, amaduka atari ay’ibiribwa bazafungwa mu gihe cy’amezi abiri.
Uganda yugarijwe n’inkubiri ya kabiri ya COVID-19 aho ubwoko bushya bw’iyi virus buzwi nka Delta buri kwihuta mu kwandura no kwica abantu.
Igihugu kiri mu mategeko akomeye ya ‘guma mu rugo’, gusa ibirori bihuza abantu nk’ubukwe byemerewe kutarenza abantu 20, uwafatwa yakiriye abarenze abo na we ashobora gufungwa.
Abakuru b’ingo cyangwa ba nyiri ahantu runaka habonetse abanduye Covid-19 batarabibwiye abashinzwe ubuzima na bo bashobora gukatirwa igifungo.
Kutambara agapfukamunwa uri hanze y’aho uba cyangwa gufasha umuntu gucika ahantu bashyira abanduye Covid-19 mu kato, na byo bishobora kugufungisha.
Kuva iki cyorezo cyagera muri Uganda Polisi yavuzweho gukoresha imbaraga zikabije mu gushyira mu bikorwa amabwiriza yagiye atangwa, aho hari n’abantu bishwe.
Inzobere ziteganya ko Covid-19 muri Uganda ishobora kugera ku gasongero mu mpera z’ukwezi kwa karindwi no mu ntangiriro z’ukwa munani.
Abantu barenga 83,000 bamaze gusangwamo Covid-19 naho abarenga 1,900 imaze kubica muri iki gihugu, nk’uko Minisiteri y’Ubuzima yaho ibivuga.
REBA YouTube Channel UMUSEKE TV video nziza nk’iyi. UKORA LIKE SHARE na COMMENT
- Advertisement -
IVOMO: BBC
TUYISHIMIRE Raymond / UMUSEKE.RW
