Burundi: Mu Ntara ya Gitega ahahurira abantu benshi hafunzwe kubera Covid-19

webmaster 09/09/2021 11:36

Ukeneye kwamamaza! Gusobanuza! Gutanga amakuru? Hamagara 0788772818

Abategetsi mu Ntara ya Gitega ku murwa mukuru wa politike w’Uburundi, bafashe ingingo yo gufunga ahantu hose hahurira abantu benshi, ni mu mugambi wo kwirinda no kurwanya ikwirakwira ry’icyorezo cya Covid-19.

*Mu Ntara ya Gitega ku murwa mukuru wa poliki w’Uburundi*

Mu byumweru bibiri bishize, mu Ntara ya Gitega abantu basaga 1100 banduye Covid-19, Ubutegetsi bwahisemo gufunga ahahurira abantu benshi harimo ibibuga by’umupira, Ibitaramo, utubari n’ibindi bihuriramo abantu benshi.

Abayobozi mu Ntara ya Gitega bavuga ko icyorezo cya Covid-19 kimaze gufata umurego muri kiriye gice.

Umuyobozi wa Komine ya Gitega, Jacques Nduwimana yabwiye Ijwi ry’Amerika dukesha iyi nkuru ko byibura mu cyumweru kimwe habonetse abantu barenga 60o banduye Covid-19 muri iyo Ntara.

Bamwe mu baturage b’i Gitega bavuga ko bagiye kwisubiraho kuko amabwiriza yo kwirinda Covid-19 babanje kuyakerensa.

Minisiteri y’Ubuzima mu Burundi itangaza ko mu Ntara ya Gitega habonetse abantu 1.100 mu byumweru bibiri banduye Covid-19 mu gihe mu gihugu hose abarenga 13.000 bamaze kwandura iki cyorezo.

N’ubwo imibare y’abandura Covid-19 ikomeje kuzamuka ntago Uburundi buratangira gutanga inkingo hirya no hino mu gihugu, ni mu gihe Banki y’Isi yemeye gutanga imfashanyo y’inkingo.

Minisitiri Ndirakobuca Gervais ukuriye itsinda ryo kurwanya Covid-19 mu Burundi, aherutse gutangaza ko Leta itazashyiraho ingufu mu kwikingiza Covid-19 ko uzashaka gukingirwa azabikora ku giti cye akazirengera n’ingaruka bizamugiraho.

- Advertisement -

Avuga ko Uburundi nta mafaranga na macye buzatanga muri iki gikorwa ko icyo bazakora ari ukwakira izo nkingo zigafata uzishaka.

Umuryango wa Afurika y’Iburasirazuba EAC uhertse gutangaza ko hagiye gushyirwaho itegeko mu bihugu bitandatu bigize uyu muryango ryo kutemerera umuntu utarafata urukingo kuva mu gihugu ajya mu kindi.

Iyi ngingo ya EAC yamaganiwe kure n’Uburundi, Minisitiri w’Intebe, Allain Guillaume Bunyoni yavuze ko kwaba ari uguhonyanga ubwingenge bw’uyu muryango.

REBA YouTube Channel UMUSEKE TV video nziza nk’iyi. UKORA LIKE SHARE na COMMENT