Ukeneye kwamamaza! Gusobanuza! Gutanga amakuru? Hamagara 0788772818
Mu butumwa yanyujije kuri Twitter, Perezida w’u Burundi, Evariste Ndayishimiye yamaganye ihirikwa ku butegetsi rya Alpha Condé ryabaye kuri iki cyumweru tariki ya 05 Nzeri 2021.
Mu bamaganye iyi Coup d’Etat barimo abategetsi bakomeye barimo Umunyamabanga Mukuru wa UN, Antonio Guteres, Perezida Antoine Félix Tshisekedi wa RDCongo, Moussa Faki Mahamat n’umuryango wa CEDEAO.
Ni Coup d’Etat yakozwe n’umutwe w’Ingabo zidasanzwe muri kiriya gihugu uyobowe na Lt Col Mamady Doumbouya wavuze ko abaturage bari barambiwe n’ubukene ndetse na ruswa byashinze imizi muri Guinée.
Mu mashusho yacishijwe kuri Televiziyo y’Igihugu, Lt Col Mamady Doumbouya yavuze kandi ko asheshe Itegeko Nshinga, Inteko Ishinga Amategeko ndetse na Guverinoma.
Itsinda ry’Abasirikare bahiritse ubutegetsi biyise ko ari Komite y’Igihugu y’Ubwiyunge n’Iterambere, (National Committee for Reconciliation and Development), bavuga ko itegeko nshinga bariseshe ndetse bakazashyiraho irindi, ritagira uwo riheza.
Perezida w’u Burundi Evarste Ndayishimiye, abicishije ku urukuta rwe rwa Twitter yamaganye iri hirikwa ku butegetsi, asaba ko hakurikizwa Itegeko Nshinga.
Ati: “Namaganye nivuye inyuma ihirikwa ku ubutegetsi muri Repebulika ya Guinée, ndasba ituze no kugarura iyubahirizwa ry’Itegeko Nshinga.”
Leta Zunze Ubunwe za Amerika na yo yasohoye itangazo ryamagana guhirika ubutegetsi muri Guinée/Guinea. USA yasabye ababigizemo uruhare bose guhagarika akaduruvayo mu gihugu no kugendera ku mategeko.
- Advertisement -
Umunyamabanga mukuru wa ONU n’uw’ishyirahamwe ry’ubumwe bw’Afurika na byo bamaganye iyi Coup d’Etat basaba ko Perezida Alpfa Condé arekurwa mu maguru mashya.
Mamdy Doumbouya, wahiritse ubutegetsi muri Guinée Conakry yari asanzwe akuriye ingabo z’umutwe udasanzwe washinzwe muri 2018, akaba yizerwaga cyane na Alpha Condé gusa mu kwezi kwa Gatanu muri uyu mwaka byigeze guhwihwiswa ko yatawe muri yombi, amakuru Leta irayahakana.
Aba basirikare basabye Abategetsi bakomeye barimo ba Minisitiri kwitabira inama iteganyijwe kuri uyu wa Mbere nta n’umwe uvuyemo, utahagera ngo baramufata nk’inyeshyamba.
https://p3g.7a0.myftpupload.com/indi-coup-detat-muri-africa-perezida-wa-guinea-yakuwe-ku-butegetsi-nabasirikare.html
NDEKEZI JOHNSON / UMUSEKE.RW
