U Rwanda rwamaganye ibirego bya HRW birushinja guhutaza uburenganzira bwa muntu

Ukeneye kwamamaza! Gusobanuza! Gutanga amakuru? Hamagara 0788772818

Guverinoma y’u Rwanda yanenze raporo y’umuryango mpuzamahanga uharanira uburenganzira bwa muntu,Huma Right Watch (HRW), irushinja  guhungabanya uburenganzira bwa muntu.

Umuryango  mpuzamahanga uharanira uburenganzira bwa muntu, Human Rights Watch (HRW),kuwa mbere w’iki cyumweru  wasohoye  raporo ivuga ko u Rwanda  rwafungiye abantu  ku kigo cyinyuramo abantu by’igihe gito i Gikondo hazwi nko  kwa Kabuga mu gihe rwiteguraga kwakira inama ya  CHOGM.

Ni mu gihe iki kigo giherereye igikondo(Gikondo Transit Center)  cyinyuramo abantu by’igihe gito kidashobora kumarana umuntu amasaha arenze 72.

Raporo yasohowe na HRW ivuga ko abafunzwe barimo abana bo ku muhanda, abacururiza ku mihanda, indaya, abatinganyi n’abandi batandukanye.

Umuvugizi wa Guverinoma y’u Rwanda ,Yolande Makolo, abinyujije kuri Twitter, yavuze ko  ko raporo ya HRW ari ukugerageza guhungabanya urwego rw’ingenzi rw’ubukungu bw’igihugu  hakoreshejwe ibirego byacuzwe.

Makolo yashimangiye ko ibirego bya HRW byuzuyemo ibinyoma  kuko u Rwanda rutigera rukora ivangura.

Yagize ati: “U Rwanda ntiruvangura ku gitsina cyangwa ku mahitamo ashingiye ku gitsina mu mategeko, mu igenamigambi cyangwa mu ngiro.”

Yakomeje agira ati “Raporo ya HRW ni ugushaka  kugerageza no guhungabanya urwego rw’ingenzi rw’ubukungu bwacu  hakoreshejwe ibirego byacuzwe.”

Uyu muryango umaze  imyaka myinshi ukora raporo zitandukanye ku  Rwanda ziruharabika, ibintu leta y’u Rwanda itahwemye kugaragaza ko ari ibinyoma.

Mu mwaka wa 2018 uyu muryango  wahagaritswe gukorera ku butaka bw’u Rwanda nyuma y’igihe kirekire utangaza amakuru y’abo wita ko bibasiwe cyangwa bagiriwe nabi na Leta, nyamara hakorwa iperereza rikagaragaza ko atari ko biri.

Ni nyuma ya za raporo zitandukanye zirimo  n’iyasohotse muri Werurwe uyu  mwaka ishinja u Rwanda  kudatanga ubwisanzure bw’itangazamakuru.

Muri iyo raporo yatangajwe na Lewis Mudge uhagarariye HRW muri Africa yo hagati avuga ko abakora itangazamakuru mu Rwanda binyuze ku muyoboro wa Youtube badahabwa ubwisanzure mu gutanga ibitekerezo byabo.

TUYISHIMIRE RAYMOND / UMUSEKE.RW