Urubanza ruregwamo abahoze mu buyobozi bwo hejuru muri FDLR rwasubitswe

Ukeneye kwamamaza! Gusobanuza! Gutanga amakuru? Hamagara 0788772818

Nkaka Ignace alias La Forge Fils Bazeye wahoze ari Umuvugizi w’Umutwe wa FDLR, washyizwe ku rutonde rw’iy’iterabwoba, na mugenzi we Nsekanabo Jean Pierre alias Abega Kamara wari ushinzwe ubutasi muri uwo mutwe urubanza rwabo rwasubitswe.

Kuri uyu wa 03 Nzeri 2021 urubanza rwabo byari biteganyijwe ko rusubukurwa, ubushinjacyaha bwari kuvuga icyifuzo cyabwo kuri aba bagabo bombi baregwa ibyaha bifitanye isano n’iterabwoba.

Umunyamakuru wa UMUSEKE wageze ku rugereko rwihariye rushinzwe kuburanisha ibyaha mpuzamahanga n’ibyambukiranya imipaka ruri i Nyanza mu Majyepfo y’u Rwanda, ubwanditsi bw’urukiko bwamubwiye ko uru rurubanze rutari bube kubera ko umwe mu Bacamanza bagize inteko ibaburanisha arwaye.

Nkaka Ignace alias La Forge Fils Bazeye wahoze ari Umuvugizi w’umutwe wa FDLR na mugenzi we Nsekanabo Jean Pierre alias Abega Kamara bombi bemera ibyaha bine muri bitandatu bifitanye isano n’iterabwoba baregwa.

Bemera ko bari mu mutwe wa FDLR  bagahakana ko nta ruhare na ruto bagize mu kuwushinga ko ahubwo bawusanzeho.

Bahakana ibikorwa byo kugaba ibitero mu bihe bitandukanye mu bice by’Amajayaruguru n’Uburengerazuba bw’u Rwanda uwo mutwe wagiye ugaba bigahitana ubuzima bw’inzirakarengane, bakavuga ko nta bubasha bagiraga mu gufata ibyemezo ko ahubwo byafatwaga n’abari babakuriye muri uwo mutwe.

Abaregwa bombi kandi mu myiregurire yabo iheruka bahurije ku gusaba imbabazi umuryango nyarwanda, bagasaba ubuyobozi muri rusange kubacira inkoni izamba bavuga ko bafashije igihugu mu bikorwa byo gutanga amakuru bityo ko igihe bababarirwa basubizwa mu buzima busanzwe nk’abandi bagiye bava muri FDLR byagiye bigenda.

Icyifuzo cyabo Ubushinjacyaha bwagiteye utwatsi bubishingira ko abasubira mu buzima busanzwe bavuye muri FDLR baba bizanye bitandukanye n’aba bafatiwe ku mupaka wa Repubulika iharanira Demokarasi ya Congo na Uganda bavuye muri Uganda, ngo mu mishyikirano n’undi mutwe wa RNC na wo ufatwa nk’uwiterabwoba n’ubutegetsi bw’u Rwanda.

Ntiharamenyekana igihe urubanza rwaba bombi ruzasubukurirwa.

https://p3g.7a0.myftpupload.com/la-forge-wabaye-umuvugizi-wa-fdlr-yemeye-ibyaha-4-muri-6-aregwa-abega-na-we-hari-ibyo-yemeye.html

REBA YouTube Channel UMUSEKE TV video nziza nk’iyi. UKORA LIKE SHARE na COMMENT

Theogene NSHIMIYIMANA
UMUSEKE.RW