Ukeneye kwamamaza! Gusobanuza! Gutanga amakuru? Hamagara 0788772818
Muri Gicurasi Urukiko Rwisumbuye rwa Gasabo rwakatiye Dr Daphrose Gahakwa wabaye Minisitiri w’Uburezi, akaba n’Umuyobozi Mukuru w’Ikigo cy’Igihugu cy’Ubuhinzi n’Ubworozi (RAB), igifungo cy’amezi 15 muri Gereza ya Nyarugenge, runategeka ko atanga ihazabu ya Frw 500, 000 Umuseke wamenye ko Ubushinjacyaha bwajuriye.
Icyo gihe Umucamanza yavuze ko uruhande rutishimiye imikirize y’urubanza rufite iminsi 30 yo kujurira. Muri Kamena 2021 Ubushinjacyaha bwajuririye icyemezo cy’Urukiko Rwisumbuye rwa Gasabo, mu Rukiko Rukuru.
Ubwo Umuseke wamenyaga ko Dr Daphrose Gahakwa Ubushinjacyaha bwamujuririye Umunyamakuru yabajije mu bwanditsi bw’Urukiko Rukuru itariki urubanza rwahawe mu bujurire.
Umwanditsi w’urukiko avuga ko urubanza rutarahabwa itariki y’igihe ruzaburanishirizwa kuko Urukiko rutanga itariki bitewe n’uko ibirego byakiriwe.
Umwanditsi w’Urukiko Rukuru yakomeje avuga ko ikirego cy’Ubushinjacyaha cyakiriwe muri Kamena 2021.
Faustin Nkusi umuvugizi w’ubushinjacyaha yemereye Umuseke ko Ubushinjacyaha bwajuririye Dr Daphrose Gahakwa, cyakora yirinda kuvuga impamvu z’ubujurire bwabo.
Umuseke wabajije Faustin Nkusi impamvu zikomeye zatumye Ubushinjacyaha bujuririra Dr Daphrose Gahakwa, asubiza ko zizamenyekana mu Rukukiko.
Ati “Nimutegereze azahabwe itariki yo kuburana hanyuma impavu z’ubujurire bwacu tuzisobanure mu Rukiko, ubwo namwe muzaba muhari muzumve.”
- Advertisement -
Dr Gahakwa Daphrose Ubushinjacyaha bwamutaye muri yombi mu ntangiriro z’Ukwakira 2020 icyo gihe bwavuze ko bumaze igihe bumukurikirana ku makosa yakozwe y’imitangire y’isoko ryatanzwe ryo kuhira imyaka rifite agaciro ka Miliyari 1Frw aho iryo soko ryahawe umukwe we, maze umugabo we ari we Gahakwa ahita agirwa Umuyobozi Mukuru w’ishyirwa mu bikorwa ry’uwo mushinga.
Dr Gahakwa Daphrose Ubushinjacyaha bwamukurikiranyeho ibyaha bimunga ubukungu bw’igihugu. Birimo icyaha cyo Kunyereza umutungo wa Leta n’icyo Guha isoko umuntu utabifitiye ububasha.
Ubushinjacyaha bujuririye Dr Daphrose Gahakwa mu gihe yaburaga amezi atatu ngo arangize igihano yakatiwe n’Urukiko.
Uyu Mubyeyi mu gihe yasoza igihano cy’amezi 15 yakatiwe n’Urukiko Gereza yamurekura akazaburana ubujurire bwe adafunze.
UMUSEKE.RW
