Manchester United yirukukana uwari umutoza wayo Ole Gunnar Solskjaer nyuma y’uko iyi kipe itsinzwe undi mukino muri Shampiyona y’u Bwongereza igayitse, 4-1.
Mu butumwa Manchester United yashyize kuri Twitter ku gicamunsi yemeje ko Gunnar Solskjaer atakiri umutoza wayo.
Bagize bati “Manchester United iremeza ko Ole Gunnar Solskjaer yavuye mu nshingano ze nk’umutoza. Warakoze kuri buri kimwe Ole.”
Ole yirukanywe nyuma y’amasaha make ikipe yatozaga itsinzwe ibitego 4-1 na Watfor ku mukino wa 12 wa Premier League.
Gutsindwa byiyongera ku yindi mikino ikipe imaze ikina igatsinzwa kandi ibitego byinshi.
Byatumye ubuyobozi bw’ikipe buteranya inama y’igitaraganya ubwo umukino wa Watford wari urangiye kuri uyu wa Gatandatu tariki 20 Ugushyingo, 2021 ari na yo yafatiwemo umwanzuro wo kwirukana uyu mutoza wari uyimazemo imyaka ine.
Mu mikino 12 Man U imaze gukina muri Premier League uyu mwaka, ifite amanota 17 ikaba ku mwanya wa karindwi.
Ikinyamakuru The Times cyo mu Bwongereza cyatangaje ko ubuyobozi bwa Manchester United bwemeye kwishyura uyu mutoza miliyoni 7,5£ kugira ngo asezererwe nubwo yaherukaga gusinya amasezerano mashya y’imyaka itatu muri Nyakanga uyu mwaka.
Ole Gunnar Solskjaer watsinze umukino umwe, akanganya undi mu mikino irindwi iheruka ya Premier League, yatangiye gutoza Manchester United mu Ukuboza 2018 ubwo yari asimbuye José Mourinho.
- Advertisement -
Muri Nyakanga uyu mwaka yari yongerewe amasezerano yagombaga kurangira mu 2024.
Umunya-Norvege Ole Gunnar Solskjaer yari amaze gukoresha miliyoni 387 z’ama-Euro mu ikipe, gusa nta gikombe na kimwe yigeze atwara.
Ukeneye kwamamaza! Gusobanuza! Gutanga amakuru? Hamagara 0788772818
UMUSEKE.RW
