Guverinoma ya Israel yatangaje ko bari gutegura uko batanga doze ya kane y’urukingo rwa Covid-19 bahereye ku bakora mu nzego z’ubuzima n’abakuze bafite hejuru y’imyaka 60 y’amavuko.
Mu gihe isi ikomeje guterwa impungenge n’ubwandu bwihinduranyije bwa Covid-19 buzwi nka Omicron, na nyuma y’uko muri Israel umuntu umwe bimenyekanye ko yahitanywe nayo kuri uyu wa Kabiri, tariki 21 Ukuboza 2021, Minisitiri w’Intebe, Naftali Bennett, yavuze ko iki gihugu kiri gutegura gutanga doze ya kane y’urukingo rwa Covid-19, aho bazahera ku bakuze gusa ngo bategereje ko inzego z’ubuzima zibyemezwa.
Minisitiri Naftali Bennett avuga ko iyi doze ya kane ubwo bizemezwa ko itangwa n’inzego z’ubuzima, izajya ihabwa abamaze byibura amezi ane bahawe doze ya gatatu y’urukingo.
Minisiteri y’Ubuzima ya Israel ivuga ko bamaze kubona abantu basaga 340 basanganywe ubwandu bushya bwihinduranyije bwa Omicron, naho umwe ahitanwa na yo, bityo ngo gutanga doze ya kane bizafasha mu guhangana n’iki cyorezo kihinduranyije.
Israel iri mu bihugu bya mbere byatangiye gutanga urukingo rwa Covid-19, mu Ugushyingo 2021 iki gihugu cyatangaje ko abana bafite imyaka itanu y’amavuko na bo bakingirwa.
Muri iki gihugu, muri miliyoni 9.3 z’abaturage, 63% bamaze guhabwa doze ebyeri z’urukingo rwa Covid-19, gutanga doze ya gatatu bigeze ku bafite hejuru y’imyaka 14.
Kuva Covid-19 yakwadukwa, muri Israel abantu miliyoni 1.36 bamaze kuyandura naho abantu 8,200 bahitanwa na yo.
Israel yamaze gukomanyiriza abagenzi baturuka muri Leta Zunze Ubumwe z’Amerika, Ubudage, Canada, Ubutaliyani na Canada kwinjira muri iki gihugu kubera icyorezo cya Omicron.
REBA YouTube Channel UMUSEKE TV video nziza nk’iyi. UKORA LIKE SHARE na COMMENT
