Ingabo za Repubulika ya Demokarasi ya Congo (FARDC) zatangaje ko zataye muri yombi umucurabwenge ufatwa nka kizigenza mw’ikoranabuhanga w’umutwe w’iterabwoba wa ADF.
Kuri uyu wa 28 Gashyantare 2022 nibwo FARDC yavuze ko yafashe Muthatindwa Moïse, yafatiwe ahitwa Isiro muri Haut-Uélé.
Capitaine Antony Mwalushayi, umuvugizi wa Operasiyo ya Sokola 1 muri Kivu ya Ruguru yavuze ko uyu mugabo yafashwe n’inzego z’umutekano kuri iki Cyumweru.
Yagize ati ” Muthatindwa Moïse, umuhanga mw’ikoranabuhanga akaba n’umurwanyi w’umutwe w’iterabwoba wa ADF/MTM yafashwe ejo hashize( Ku cyumweru) n’inzego z’umutekano Isiro.”
Akomeza avuga ko yasaganwe ibimenyetso bigaragaza ko igisasu cyaturikijwe kuwa 05 Gashyantare 2022 i Oïcha muri Teritwari ya Beni ariwe wagiteguye.
Inkundura yo guta muri yombi abarwanyi ba ADF irakomeje, benshi bamaze gutabwa muri yombi kuva mu ntangiriro za 2022.
Kuwa 14 Gashyantare 2022 Ingabo za FARDC zataye muri yombi uwitwa Zarad Zerad Saïdi indwanyi akaba n’icyihebe karundura wari uzwi muri ADF.
FARDC n’Ingabo z’Ubugande bakomeje ibikorwa byo guhashya umutwe w’iterabwoba wa ADF no guhangana n’imitwe yitwaje intwaro yayogoje Intara ya Kivu ya Ruguru na Ituri.
Ukeneye kwamamaza! Gusobanuza! Gutanga amakuru? Hamagara 0788772818
NDEKEZI JOHNSON / UMUSEKE.RW
