Ubwo umuhanzikazi mu ndirimbo zo guhimbaza Imana ukomoka muri Tanzaniya, Rose Muhando yari amaze kuririmba mu rusengero rwitwa Foursquare Gospel Church i Kigali, Bishop Dr Masengo Fidèle yanyuzwe n’imbaraga ze ku rubyiniro ahishura ko hari abahanzi ba maringaringa batumira bakabasondeka.
Rose Muhando wari watumiwe mu gitaramo cya Praise&Worship cyateguwe na Rwanda Gospel Stars Live cyabaye ku Cyumweru ku i Rebero aracyari mu Rwanda, kuri uyu wa Mbere yaririmbye mu masengesho yatumiwemo n’urusengero rwa FourSquare Gospel Church.
Iki cyamamare mu muziki uhimbaza Imana muri Afurika y’Iburasirazuba, ntiyabashije gusubira muri Tanzaniya kuri uyu wa mbere nk’uko byari biteganyijwe kuko yabwiwe ko indege ya hafi iri kuwa Gatatu w’iki cyumweru.
Nyuma yo gusubika urugendo yahise atumirwa mu masengesho yateguwe na FourSquare Gospel Church iyoborwa na Bishop Dr Masengo Fidèle yiswe “Ibyumweru Birindwi byo gusibura amariba.”
Muri aya masengesho, Rose Muhando yaririmbye isaha irenga, yavuze ko yashimishijwe n’uko yatumiwe n’uru rusengero agahabwa umwanya wo kugirana ibihe byiza n’abakristu banyuzwe n’ubutumwa bwiza yabagejejeho.
Rose Muhando yavuze ko uru rusengero yari asanzwe aruzi ku mbuga nkoranyambaga, kubwe ngo Imana yamukoreye igitangaza agirirwa ubuntu bwo kururirimbiramo.
Abaririmbyi n’abacuranzi bo muri FourSquare Gospel Church bafashije Rose Muhando ubwo yaririmbaga mu buryo bwa Live, yashimye impano yabo abatumira kuzaza muri Tanzaniya bakaririmbana kubera ubuhanga yabasanganye.
Yavuze ko atari ubwa mbere ahuye na Bishop Masengo kuko mu mwaka wa 2017 bahuriye i Mwanza mu giterane gikomeye cyahabereye.
Abayoboke biri torero bashimishijwe n’indirimbo za Rose Muhando, yatashye bakimusaba kuririmba ababwira ko akomeza kubasusurutsa kuri uyu wa Kabiri.
Bishop Dr Masengo Fidèle watumiye Rose Muhando muri aya masengesho y’ibyumweru birindwi mu kiganiro cy’umwihariko yahaye UMUSEKE, yavuze ko yamenyaniye na Rose Muhando Mwanza muri Tanzaniya muri Gicurasi 2017 mu giterane bose bari batumiwemo bongera guhurira mu kindi giterane muri 2018.
BishopDr Masengo ati“Ubushuti bwacu niho bwatangiriye ni nayo mpamvu ari hano uyu munsi.”
Bishop Dr Masengo Fidèle yavuze ko yagize amagirwe agatumirwa na Rwanda Gospel Stars Live nawe agahita aboneraho akamusaba ko yamubera umunshyitsi.
Avuga ko kimwe mucyo akundira Rose Muhando ari ukuntu iyo agiye kuririmba akoresha imbaraga nyinshi cyane akitanga wese.
- Advertisement -
Ati “Iyo Rose Muhando ageze kurubyiniro aririmba yitanze wese, kandi iyo ari kuririmba ashimisha abantu bose bamukurikiye kandi indirimbo ze zifite ubuzima,ntabwo Muhando ameze nka bahanzi utumira bagera kurubyiniro bakaba maringaringa aho kuririmba bakirya.”
Bishop Dr Masengo Fidèle ni umugabo umaze kubaka izina ukunzwe n’urubyiruko cyane mu nyigisho ze atanga, amaze imyaka 16 ari umuyobozi mukuru wa FourSquare Gospel Church.
