Mu gikorwa cy’imyidagaduro kizwi nka AIC x MOCA Summit & Festival kizanitabirwa n’itsinda rikomeye rya Magic System, hateganyijwemo n’irushanwa, aho babiri [umuhungu n’umukobwa] bazaryegukana bazahabwa ibihembo bifite agaciro k’Ibihumbi 10$ kuri bombi.
Ibi bikorwa by’imyidagaduro birimo n’iserukiramuco, byateguwe n’Ikigo Nyafurika kizwi nka AIC (African In Colours) n’urubuga ndangamuco mu buhanzi Nyafurika ruzwi nka MOCA (Movement of Creatives Africas), rizaba kuva tariki 30 Kamena kugeza tariki 03 Nyakanga 2022 mu Mujyi wa Kigali.
Iki gikorwa kizabamo ibikorwa binyuranye, hanateganyijwemo irushanwa rizitabirwa n’abatarengeje imyaka 25 aho abazaryegukana babiri, umuhungu n’umukobwa bazahabwa ibihembo bifite ibihumbi 10$ (arenga Miliyoni 10 Frw) kuri bombi.
Iri rushanwa ry’imyidagaduro rizakorwa hifashishijwe ikoranabuhanga, aho abifuza kuryitabira, bazakora amashusho n’indirimbo, ubundi bakabisangiza ababakurikira ku mbuga nkoranyambaga.
Abifuza guhatana muri iri rushanwa, bazifata amashusho baririmba ubundi bayashyire ku mbuga nkoranyambaga zabo basangije (bakoze tag) ikigo African In Colours ku mbuga nkoranyambaga zacyo zirimo Instagram, Facebook ndetse na Twitter.
African In Colours itangaza ko abifuza kwitabira iri rushanwa batagomba kurenza tariki 20 Kamena 2022.
UMUSEKE.RW