Mu mpera z’icyumweru gishize, Ishyirahamwe Nyarwanda ry’Umukino wa Rugby, ryasoje irushanwa ryo Kwibuka ku nshuro ya 29 Jenoside yakorewe Abatutsi muri Mata 1994.
U Rwanda n’Isi muri rusange, bari mu minsi 100 yo Kwibuka ku nshuro ya 29 Jenoside yakorewe Abatutsi muri Mata 1994. Ni muri urwo rwego no mu mikino batatanzwe gukomeza kuzirikana Abatutsi bishwe muri Jenoside.
Iri rushanwa ryakinwe ku Cyumweru tariki 21 Gicurasi 2023 ku kibuga cya Croix Rouge Kacyiru ahasanzwe hakinirwa imikino ya shampiyona y’icyiciro cya Mbere.
Amakipe 14 ni yo yitabiriye iri rushanwa, harimo umunani y’abagabo n’amakipe atandatu mu cyiciro cy’abagore. Mu bagabo buri tsinda ryashyizwemo amakipe ane, mu gihe mu bagore ryashyizwemo atatu.
Habanje gukinwa imikino y’amajonjora yo gushaka amakipe agana ku mukino wa nyuma, wagombaga gutanga iyegukana igikombe. Buri tsinda ryagiye rikina ukwaryo.
Mu bagabo, itsinda rya mbere ryayobowe na Thousand Hills nyuma yo gutsinda imikino yose, ndetse bigenda uko kuri Lion de Fer yari mu itsinda rya Kabiri.
Mu cyiciro cy’abagore, Ruhango Zebras yayoboye itsinda rya Mbere, mu gihe Kaminuza y’u Rwanda ishami ry’Uburezi (UR-Rukara) yasoje imikino yo mu itsinda rya Kabiri iriyoboye.
Ibi byasobanuraga ko amakipe yayoboye amatsinda muri buri Cyiciro, ari yo yagombaga gukina umukino wa nyuma.
Mu bagabo, Lion de Fer n’ubundi yahabwaga amahirwe, ni yo yegukanye irushanwa nyuma yo gutsinda Thousand Hills ku mukino wa nyuma ku manota 17-7. Ikipe ya Ruhango Zebras yegukanye itsinze Kaminuza y’u Rwanda ishami ry’Uburezi (UR-Rukara) ku manota 42-00.
- Advertisement -
Nyuma yo gusoza irushanwa, mu butumwa yageneye abitabiriye iyi mikino, Umuyobozi w’agateganyo wa Komite Olempike y’u Rwanda, Umulinga Alice, yashimiye iri shyirahamwe kubera uko ryateguye irushanwa kandi rikagenda neza.
Ati ”Mu izina rya Komite Olempike y’u Rwanda, ndashimira Ishyirahamwe ry’Umukino wa Rugby ryateguye iri rushanwa ndetse rikaba ryagenze neza.”
Yongeye ati “By’umwihariko, ndashimira amakipe yaryitabiriye mu byiciro byombi n’abegukanye ibikombe. Nk’abakinnyi, ndabasaba gukomeza kwimakaza Indangagaciro ziranga ababarizwa mu gice cya Siporo [Aba-sportifs], kuko mufite izi ndangagaciro nta ho mwahera mwishora mu bikorwa bibi birimo no gukora Jenoside.”
Agaruka kuri iri Rushanwa, Umunyamabanga wa RRF, Uwitonze Félix yashimiye abitabiriye irushanwa bose ndetse anishimira uko irushanwa ryagenze muri rusange.
Ati ”Iri rushanwa rivuze byinshi mu mateka yacu, kuko kunamira no guha icyubahiro Abatutsi bishwe muri Jenoside yakorewe Abatutsi mu 1994, ni inshingano za buri wese, by’umwihariko Aba-sportifs.”
Yongeyeho ati ”Kuba amakipe yitabiriye ku kigero cyo hejuru, byerekana ko umuco w’Ubworoherane no gushimangira Indangagaciro za Siporo bigenda byumvikana. Bityo hakagenderwa kure icyazongera gusuzibiza u Rwanda mu mateka mabi twanyuzemo.”
Uko imikino yose yagenze:
1000 Hills 10-07 Muhanga Thunders
Burera Tigers 00-43 Lion de Fer
UR Grizzlies 05-00 Rubavu Balck Eagles
UR-Rukara 00-30 Kigali Sharks (Walkover)
UR Grizzlies 23-00 Kamonyi Panthers A (Abagore)
Muhanga Thunders 18-00 UR Grizzlies
UR-Rukara 00-30 Burera Tigers (Walkover)
UR-Rukara 10-05 Kamonyi Panthers B (Abagore)
Rubavu Black Eagles 00-45 1000 Hills
Kigali Sharks 19-12 Burera Tigers
UR Grizzlies 05-10 Ruhango Zebras (Abagore)
1000 Hills 57-00 UR Grizzlies
Lions de Fer 30-00 UR Rukara (Walkover)
Lion de Fer 00-12 Kamonyi Panthers B (Abagore)
Rubavu Black Eagles 05-33 Muhanga Thunders
Lions de Fer 26-05 Kigali Sharks
Ruhango Zabras 24-00 Kamonyi Panthers A (Abagore)
Lions de Fer 00-42 UR Rukara (Abagore)
Uko amatsinda yari ameze:
Abagabo:
Itsinda rya mbere:
Thousand Hills
Muhanga Thunders
UR Grizzlies
Rubavu Balck Eagles
Itsinda rya Kabiri:
Lion de Fer
Kigali Sharks
UR-Rukara
Thousand Hills Veterans
Abagore:
Itsinda rya Mbere:
Ruhango Zebras
Kamonyi Panthers A
UR Grizzlies
Itsinda rya Kabiri:
UR Rukara
Kamonyi Panthers B
Lion de Fer
UMUSEKE.RW