Mu mukino w’umunsi wa Cyenda wa shampiyona y’Icyiciro cya Mbere y’umupira w’amaguru, ikipe ya Kiyovu Sports yanyagiye Étoile de l’Est y’i Burasirazuba ibitego 6-1.
Ni umukino watangiye Saa kumi n’ebyiri z’ijoro, ubera kuri Kigali Pelé Stadium. Abakunzi b’Urucaca batari benshi, bari bagerageje kuza gushyigikira.
Kiyovu Sports yakinnye idafite kapiteni wa yo, Niyonzima Olivier Seifu kubera ikibazo cy’imvune yagiriye mu mukino ikipe ye yatsinzwe na Police FC ibitego 3-1.
Umutoza wa Kiyovu Sports, Petros Koukouras, yari yakoze impinduka, kuko mu bwugarizi yari yakuyemo Guy Kazindu asimburwa na Mbonyingabo Régis utasoje umukino kuko yasimbuwe na Djibril hakiri mu gice cya Mbere yo kugira imvune y’urutugu.
Ahandi Kiyovu yari yakoze impinduka, ni hagati mu kibuga kuko Muhozi Fred yari yafashe umwanya wa Niyonzima Olivier Seifu.
Ikipe y’i Burasirazuba iterwa inkunga n’Akarere ka Ngoma, yatangiye neza ndetse ibona igitego ku munota wa Gatanu, cyatsinzwe na Rwema Amza ku mupira yatereye inyuma y’urubuga rw’amahina rwa Kiyovu Sports.
Ikipe yo ku Mumena yahise ikanguka, ibona igitego ku munota wa 17 cyatsinzwe na myugariro wa Étoile de l’Est, Ndayishimiye Céléstin ku mupira wa utewe na Nizeyimana Djuma.
Nyuma yo kubona igitego cyo kwishyura kuri iyi kipe yo ku Mumena, umuriro wahise ubusa bituma umukino uhagararaho iminota igera kuri itandatu.
Umuriro ukigaruka, ntibyatinze kuko ku munota wa 25 gusa, Bayo ukina hagati mu kibuga, yahise atsindira Urucaca igitego cya Kabiri ku ishoti rikomeye maze umunyezamu wa Étoile de l’Est ayoberwa uko bigenze.
- Advertisement -
Nyuma yo gukomeza guhanahana neza kwa Kiyovu, yabonye igitego cya Gatatu ku munota wa 34 cyatsinzwe na Mugunga Yves ku mupira yari ahawe na Nizigiyimana Karim Mackenzi.
Igice cya Mbere cyarangiye Urucaca ruri imbere n’ibitego 3-1, byanatangaga icyizere cyo kwegukana amanota y’uyu munsi.
Igice cya Kabiri cyacaga amarenga ko ikipe y’i Burasizuba ishobora kunyagirwa, cyane ko nta kimenyetso cyo kurekura cyagaragaraga kuri Kiyovu Sports.
Ibintu byongeye kuba bibi ku kipe y’i Ngoma ku munota wa 66, ubwo Mosengo yatsindiraga Urucaca igitego cya Kane, maze Nshimiyimana Maurice ahita ahitamo kwicara.
Richard Kilongozi wa Kiyovu, yongeye kubona izamu ku munota wa 70, Mugunga yongera kubona inshundura ku wa 74, bikomeza kuba bibi kuri Étoile.
Nyuma yo kubona ibitego bitandatu, Kiyovu yashoboraga kubona ibindi bitego, kuko Mugunga uzwi nka Cavani, yahushije ikindi ku mupira yahinduriwe na Kilongozi ariko ntiyawushyira mu izamu.
Urucaca rwakomeje gucunga ibitego bya rwo, umukino urangira rubonye intsinzi ku bitego 6-1. Iyi ntsinzi yatumye rujya ku mwanya wa Gatatu by’agateganyo n’amanota 15.
Mu mukino w’umunsi wa cumi wa shampiyona, Kiyovu Sports izajya gusura Musanze FC kuri Stade Ubworoherane.
Undi mukino wabaye, ni uwahuje Gorilla FC yatsinzwe na Marines FC ibitego 3-2.
HABIMANA SADI/UMUSEKE.RW