Ikipe ya APR BBC yatsinze Patriots amanota 80-63 yegukana igikombe cy’irushanwa ryo kwibuka ku nshuro ya 30 Jenoside yakorewe Abatutsi mu 1994 , APR W BBC na yo icyegukana mu bagore itsinze REG W BBC amanota 85-81.
Imikino ya nyuma y’iri rushanwa ryateguwe n’Ishyirahamwe Nyarwanda ry’Umukino wa Basketball, FERWABA, yabaye mu ijoro ryo ku wa Gatandatu, tariki ya 20 Mata 2024, muri BK Arena.
Mu mukino wa nyuma mu bagabo, Ikipe y’Ingabo z’igihugu yaje ifite intege yo kwihorera kuri Patriots yayitsinze mu mikino ibanza ya shampiyona y’Icyiciro cya Mbere.
Aba basore b’Umutoza Mazen Trakh batangiye neza umukino batsinda uduce tubiri tubanza ku manota 25-17 na 19-12, bituma basoza igice cya mbere bayoboye n’amanota 44-29.
APR BBC yatangiye agace ka gatatu iri hejuru cyane nk’uko yabikoze mu gice cya mbere, birangira na ko ikegukanye ku manota 18-24. Patriots yari imaze gutakaza icyizere cyo kwigaranzura APR muri uyu mukino, yaje mu gace ka kane ikora iyo bwabaga iragatwara, ku manota 20-18.
Agace kamwe Patriots yatwaye ntikari gahagije ngo yegukane intsinzi kuko yari yamaze gutsindwa amanota menshi mu duce twari twabanje, bituma umukino urangira APR BBC yegukanye intsinzi ku kinyuranyo cy’amanota 17, ihita inegukana igikombe.
Guard Noel Obadiah ari mu bitwaye neza muri uyu mukino ku ruhande rwa APR, aho yatsinze amanota 13, akora na rebounds eshatu, mu gihe Zion Styles we yatsinze amanota 23, anakora rebounds ebyiri.
Ku ruhande rwa Patriots, Turatsinze Olivier ni we watsinze amanota menshi (21), naho Mugenzi we bakinana, Ndizeye Dieudonné, atsinda amanota 14.
Mu wundi mukino wa nyuma wabaye, Ikipe y’Ingabo z’igihugu mu bagore yegukanye igikombe itsinze Rwanda Energy Group (REG) amanota 86-81 (23-14,22-22,18-16,9-29 , 14-9). Muri uyu mukino Sandrine Kantore ni we watsinze amanota menshi (19).
- Advertisement -
Umwanya wa gatatu mu bagabo wegukanwe na REG itsinze Tigers amanota 94-92 (30-19, 15-21, 21-24, 28-28), ni mu gihe mu bagore umwanya wa gatatu ho watwawe na Kepler itsinze GS Marie Reine amanota 76-64 (6-21, 23-15, 21-17, 26-11).
Mu mikino yabaye ku wa Gatanu, APR BBC yasezereye REG BBC muri 1/2 iyitsinze amanota 96-66 (25-17, 34-12, 17-22, 20-15), mu gihe Patriots yatsindiwe ku mukino wa nyuma yo yari yasezereye Tigers BBC ku manota 64-59 (19-11, 16-16, 12-20, 17-12).
Mu bagore, APR W BBC yatwaye igikombe yageze ku mukino wa nyuma isezereye 46-40 Kepler ku manota 46-40 (17-15, 14-10, 5-10, 10-5), naho REG yo yari yatsinze GS Marie Reine amanota 76-60 (22-14, 25-23, 19-11, 10-12).
Ubwo iri rushanwa ryo Kwibuka ryaherukaga gukinwa muri Kamena 2019, ikipe ya REG ni yo yegukanye igikombe mu bagabo itsinze Patriots BBC amanota 74-71. Mu Cyiciro cy’Abagore ho ryari ryegukanwe na The Hoops itsindiye IPRC Huye ku mukino wa nyuma. Ni irushanwa ryari ryanatumiwemo amakipe yo hanze y’u Rwanda.
ISHIMWE YARAKOZE SETH KEFA/UMUSEKE.RW