Biciye ku munyezamu wa Mukura VS, Nicolas Ssebwato, iyi kipe yanganyije na Kiyovu Sports igitego 1-1 mu mukino w’umunsi wa 28 wa shampiyona.
Uyu mukino wabereye kuri Kigali Pelé Stadium, guhera Saa Cyenda z’amanywa.
Ikipe ya Kiyovu Sports yari yakoze impinduka mu bakinnyi yabanjemo ubwo yakinaga na APR FC mu mukino w’umunsi wa 27 wa shampiyona.
Ku ruhande rw’Urucaca, mu bakinnyi 11 babanjemo, hari hahindutsemo Nizeyimana Djuma, Hakizimana Félicien, Niyonzimana Olivier, Nizeyimana Abdulkarim, Ndizeye Eric na Mosengo Tansele.
Aba bakinnyi basimbuwe na Iracyandukunda Eric, Tuyisenge Hakim, Muhozi Fred, Niyonkuru Ramadhan, Twahirwa Olivier.
Mukura yo nta mpinduka yari yakoze mu baherukaga gukina umukino w’umunsi wa 27 wa shampiyona.
Umukino watangiye mu mvura nyinshi yari mu bice bitandukanye by’Igihugu, ariko ntiyari nyinshi ku buryo yatuma umukino uhagarara.
Iminota 45 y’igice cya Mbere, yarimo kubanza gucungana ku mpande zombi, byanatumaga ba myugariro batabona akazi gakomeye kuko umupira wakinirwaga hagati no ku mpande.
Igice cya Mbere cyarangiye nta kipe ibashije kubona izamu ry’indi ariko hagaragara ibimenyetso by’uko hari iza gufungura amazamu.
- Advertisement -
Bakigaruka mu gice cya Kabiri, Urucaca rwari rufite inyota yo gutanga Mukura igitego ndetse biza kuyikundira ku munota wa 65.
Richard Kilongozi Bazombwa yatsindiye Kiyovu Sports igitego, ku mupira yahawe na Alfred Leku, awuvana hagati maze awushyira ku izamu rya Kabiri, Ssebwato ntiyamenya aho uciye.
Ikipe y’i Huye ntiyacitse intege, yakomeje gukina ishakisha uko yakwishyura igitego ndetse biza kuyikundira mu minota ine y’inyongera.
Ubwo iminota 90 yari yarangiye hongeweho ine, Mukura VS yabonye koruneri, maze itewe, umunyezamu, Nicolas Ssebwato atsindisha umutwe.
Umukino warangiye amakipe yombi agabanye amanota ku gitego 1-1, bituma Kiyovu yuzuza amanota 38 iguma ku mwanya wa Karindwi, mu gihe Mukura yagumanye umwanya wa Kane n’amanota 44.
Indi mikino y’umunsi wa 28, izakinwa ku wa Gatanu tariki ya 26, ku wa Gatandatu tariki ya 27 Mata no ku Cyumweru tariki ya 28 Mata.
Abakinnyi babanjemo ku mpande zombi.
Kiyovu Sports XI: Nzeyurwanda Djihadi, Iracyadukunda Eric, Twahirwa Olivier, Kazindu Guy, Mbonyingabo Régis, Mugiraneza Frodouard, Niyonkuru Ramadhan, Tuyisenge Hakim, Richard Kilongozi, Muhozi Fred, Alfred Leku.
Mukura VS XI: Nicolas Ssebwato, Ngirimana Alex, Kayumba Soter, Muvandimwe JMV, Nisingizwe Christian, Ntarindwa Aimable, Ndayogeje Gérard, Mahoro Fidel, Samuel Pimpong, Iradukunda Elie Tatou, Uwiduhaye Abubakar.
HABIMANA SADI/UMUSEKE.RW