Rayon Sports y’Abagore yasezereye AS Kigali mu gikombe cy’Amahoro

Mu mukino wo kwishyura wa 1/2 wasojwe n’imvururu mu gikombe cy’Amahoro, ikipe ya Rayon Sports Women Football Club, yatsinze AS Kigali Women Football Club ibitego 2-0 ihita iyisezerera mu gikombe cy’Amahoro.

Ni umukino wabereye ku kibuga cyo mu Nzove, aho Rayon Sports WFC isanzwe yakirira imikino ya yo. Watangiye Saa Munani z’amanywa, witabirwa n’Aba-Rayons baburiye ibyishimo ku kipe y’abagabo.

AS Kigali WFC yaje mu Nzove ifite impamba y’igitego 1-0 yari yatsindiye kuri Kigali Pelé Stadium, mu mukino ubanza.

Iyi kipe iterwa inkunga n’uruganda rwa SKOL, byayisabaga gutsinda ku cyinyuranyo cy’ibitego 2-0 cyangwa igatsinda 1-0 bagakizwa na za penaliti.

Ku munota wa 15 w’umukino, Umunya-Malawi ukinira Rayon Sports WFC, Marry Chavinda yari afunguye amazamu ku gitego yatsindishije ukuguru kw’iburyo.

Ikipe iterwa inkunga n’Umujyi wa Kigali, yahise ibona ko ishobora kuza kugorwa n’uyu mukino ndetse igerageza kugarira, iminota 46 y’igice cya Mbere irangira nta kindi itsinzwe.

Mu gice cya Kabiri, ikipe yo mu Nzove ntiyatinze kuko ku munota wa 47, Marry Chavinda yongeye kubona izamu, maze Aba-Rayons biruhutsaho.

Icyo AS Kigali WFC yasabwaga, ni ugushaka igitego byibura kimwe kugira ngo ikomeze nk’iyabashije kubona igitego cyo hanze ariko ntibyayikundiye.

Abakinnyi ba Rwaka Claude, bakomeje gucunga ibitego bya bo, iminota 90 irangira basezereye AS Kigali ku giteranyo cy’ibitego 2-1 mu mikino yombi.

Umukino ukirangira, hagaragaye gushyamirana ku batoza bombi, Ntagisanimana Saida utoza AS Kigali WFC na Rwaka Claude utoza Rayon Sports WFC, kwaturutse ku kudasuhuzanya gusanzwe kumenyerewe nyuma y’umukino.

Gusa abashinzwe Umutekano ku kibuga, bahise bahosha izo mvururu ndetse Saida ajya mu rwambariro rw’ikipe ye, mu gihe Rwaka na we yagiye kwishimana n’abakinnyi be.

Indi kipe yageze ku mukino wa nyuma, ni Indahangarwa WFC yasezereye Fatima WFC ku giteranyo cy’ibitego 2-1 mu mikino yombi.

Rayon Sports WFC, ni na yo ibitse igikombe cya shampiyona y’uyu mwaka wa 2024, nyamara ni umwaka wa yo wa mbere mu Cyiciro cya Mbere.

HABIMANA SADI/UMUSEKE.RW