Perezida wa Ukraine, Volodymyr Zelensky, yirukanye Serhiy Rud wari ukuriye umutwe ushinzwe kumurinda, nyuma y’uko uwo mukuru w’igihugu atahuyeho ko hari Abasirikare bakuru bari bagambiriye kumwica.
Tariki 5 Gicurasi nibwo Ibiro bishinzwe Iperereza muri Ukraine (SBU) byatangaje ko byafashe abasirikare babiri bafite ipeti rya Colonel.
Aba basirikare ngo bashakaga kwica Perezida Volodymyr Zelensky hamwe n’abandi bayobozi barimo Umukuru wa SBU, Vasily Malyuk n’ukuriye Urwego rw’Ubutasi, Kirill Budanov.
Itangazo ryasohowe na Perezidansi ya Ukraine, rivuga ko Serhiy Rud wari umaze imyaka itanu akuriye umutwe w’Ingabo zirinda Perezida yakuwe kuri izo nshingano.
Nta mpamvu byatanze yatumye akurwa kuri uwo mwanya, ariko bigahuzwa n’uwo mugambi wapfubye wari ugamije guhitana Perezida Zelensky, kuko umwe mu bari bawurimo witwa Andriy Huk, yari inshuti magara ya Serhiy Rud.
Muri iyi minsi Perezida Zelensky arikanga ko haba hari abagambanyi mu Gisirikare cye bakorana n’u Burusiya.
MUGIRANEZA THIERRY / UMUSEKE.RW