Congo yiyambaje ba ‘Kadogo’ ngo bayifashe M23 ibari ku gakanu

Général-Major Peter Cirimwami Nkuba, Guverineri wa Gisirikare w’Intara ya Kivu ya Ruguru, yatakambiye abana bahoze mu nyeshyamba ‘Kadogo’, kwinjira mu gisirikare cya FARDC kugira ngo bafashe ubutegetsi bwa Tshisekedi kwigaranzura umutwe wa M23 ukomeje kubakubita amajya n’amaza.

Maj Gen Cirumwami yagaragaje ubusabe bwe mu duce twa Ndosho na Mugunga mu Mujyi wa Goma mu musangiro wateguwe hagamijwe kureshya abo bana bahoze mu mitwe y’inyeshyamba zitandukanye.

Muri icyo gikorwa cyo kubifuriza umwaka mushya wa 2025, uyu Mujenerali yabwiye abo ba ‘Kadogo’ ko bitezweho kurwanya u Rwanda, kandi uburyo bwiza bwo kubigeraho ari ukwinjira mu ngabo za RDC.

Yagize ati: ‘Nimuze mwifatanye n’ingabo kugira ngo dushobore kurwanya ubushotoranyi bw’u Rwanda, kuko twese turi inzirakarengane.’

Maj Gen Cirumwami yabwiye ba ‘Kadogo’ ko kwinjira muri FARDC ari ugutiza amaboko Tshisekedi umaze igihe asaba abakiri bato kwinjira mu gisirikare ku bwinshi kuko ngo intambara u Rwanda rwabashojeho isaba ibitambo byinshi.

Yavuze ko hari ibigo by’ijonjora mu Mujyi wa Goma kandi ko n’ahandi bitari hari amatsinda y’abasirikare yashinzwe kwinjiza ba ‘Kadogo’ mu ngabo.

M23 ubu igenzura ibice bitandukanye bya teritwari ya Rutshuru, Nyiragongo, Walikale, Lubero na Masisi mu Ntara ya Kivu ya Ruguru.

Ni mu gihe kuva ku wa Gatandatu, abarwanyi ba AFC/M23 bagenzura Masisi-Centre nk’uko byemejwe n’impande zihanganye mu mirwano.

AFC/M23 ivuga ko abaturage babarirwa muri za miliyoni ari bo bamaze gusubira mu bice bagenzura mu Ntara ya Kivu y’Amajyarugu.

Ni mu gihe hari bamwe mu baturage bavuga ko bahunga ibice bigenzurwa na Leta ya Kinshasa kubera umutekano muke, ubwicanyi, iterabwoba rya Leta n’ubugizi bwa nabi bukorwa n’ihuriro ry’ubutegetsi bwa Tshisekedi.

Kuva intambara hagati ya Repubulika ya Demukarasi ya Congo yatangira na M23, kugeza n’ubu, u Rwanda rushinjwa gufasha uyu mutwe.

Yaba Perezida Kagame n’abandi bayobozi bakuru barabihakana, bekemeza ko ari intambara ireba abaturage ba DRC n’ubuyobozi bwabo, ko ntaho u Rwanda ruhuriye nabyo.

NDEKEZI JOHNSON / UMUSEKE.RW