Aba bombi, Umuherwe w’Umunyamerika Bill Gates n’uwari umugore we Melinda Gates batangaje ko bashyize iherezo ku rushako rwabo rumaze imyaka 27.
Itangazo bombi basohoye rivuga ko: “Nyuma yo kungurana ibitekerezo no gukora ibintu bitandukanye ku rukundo rwacu, twafashe umwanzuro wo gutandukana.”
Muri iri tangazo Bill Gates yashyize kuri Twitter, avuga ko babashije kurera abana babo batatu ndetse bakubaka ikigo “Bill & Melinda Gates Foundation.” gikorera ku isi kigamije guteza imbere imibereho y’abayituye.
REBA YouTube Channel UMUSEKE TV video nziza nk’iyi. UKORA LIKE SHARE na COMMENT
Bombi biyemeje gukomeza gusenyera umugozi umwe mu gukorera kiriya kigo, ariko bavuga ko batazongera kubana nk’umugore n’umugabo mu buzima bundi basigaje imbere.
Bill Gates afite imyaka 65 y’amavuko, Melinda Gates afite imyaka 56, bahuye bwa mbere mu myaka ya 1980 ubwo Melinda yajyaga gukora muri kompanyi y’ikoranabuhanga Microsoft ya Bill Gates.
Ni umuryango w’abaherwe, Bill Gates ni umuntu wa kane ukize cyane ku isi, nk’uko bitangazwa n’ikinyamakuru Forbes Magazine, abarirwa umutungo wa miliyari 124 z’amadolari y’Amerika.
- Advertisement -
Ubukire bwe abukesha kompanyi ya Microsoft yashinganye na Paul Allen – wapfuye mu 2018, bayishinze mu myaka ya 1970, iyi ikaba ari yo ya mbere ku isi ikora ‘softwares’ nyinshi.
Melinda Gates we bivugwa ko atunze miliyari 70 z’amadolari ya America.
Basoza itangazo bagira bati “Turasaba umwanya no kutinjirirwa mu buzima bw’umuryango wacu mu gihe dutangiye ikerekezo cy’ubuzima gishya.”
AMAFOTO@Dailymail
UMUSEKE.RW
