Ministeri y’Ubuzima yatangaje ko abantu 9 bishwe na Covid-19, abanduye bashya ni 934. Imibare y’ubwandu ikomeje kwiyongera yatumye Umujyi wa Kigali ndetse n’Uturere 8 bishyirwa muri gahunda ya Guma mu Rugo izatangira tariki 17 Nyakanga 2021.
Abo Covid-19 yishe ni abagore bane b’imyaka 87 (i Kigali), 65, 33 (i Karongi), 47 (Huye) n’abagabo batanu b’imyaka 83, 65 (i Muhanga), 61 (Huye), 56 (Rubavu) n’uw’imyaka 33 (i Kigali).
Umubare w’abishwe na Covid-19 ugeze ku bantu 609.
Kuri uyu wa Gatatu handuye 934 bituma umubare w’abamaze kwandura ugera ku 50 742, muri bo abagera ku 35 582 baravuwe barakira barimo 1015 bakize mu masaha 24 ashize.
Abantu 14 533 baracyarwaye Covid-19 muri bo 74 bararembye.
Muri rusange kuva Covid-19 igeze mu Rwanda hafashwe ibipimo 1 744 198, harimo ibipimo bishya 5 324. Imibare igaragaza ko ubwandu buri ku kigereranyo cya 17,5% (Bivuze ko mu bantu ijana (100) bari ahantu hamwe bishoboka ko abagera 17 baba baranduye cyangwa barwaye Covid-19).
Abakingiwe bageze ku 401 160 harimo abagera ku 3 104 bakingiwe mu masaha 24 ashize. U Rwanda rwihaye intego nibura yo gukingira 60% by’abaturage barwo bose.
Abaturarwanda basabwa kubahiriza amabwiriza n’ingamba byashyizweho mu rwego rwo gukumira no kurinda ikwirakwira rya Covid-19.
- Advertisement -
REBA YouTube Channel UMUSEKE TV video nziza nk’iyi. UKORA LIKE SHARE na COMMENT
UMUSEKE.RW
