Kicukiro: Indege yakoreshejwe mu bukangurambaga bwihariye bwo kurwanya COVID-19

webmaster 20/09/2021 12:30

Ukeneye kwamamaza! Gusobanuza! Gutanga amakuru? Hamagara 0788772818

Kuri iki Cyumweru Akarere ka Kicukiro kakoresheje indege ya kajugujugu mu gutwara ubutumwa n’ibirango byibutsa abantu gukomeza gukaza ingamba zo kwirinda icyorezo cya COVID-19.

Umuyobozi Nshingwabikorwa w’Akarere ka Kicukiro Solange Umutesi ashyira ubutumwa buvuga kuri Covid-19 ku ndege ya kajugujugu

Ubuyobozi bwa Kicukiro buvuga ko kuba bakoresheje uburyo budasanzwe mu gukoresha indege ari ukugira ngo abaturage bongere bashyiremo ikibatsi bibuke ko COVID-19 ihari.

Indege yakoreshejwe mu gukangurira abaturage kubahiriza ingamba zo kurwanya icyorezo ca COVID-19 yazengurutse ikirere cy’Akarere cya Kicukiro.

Umutesi Solange Umuyobozi Nshingwabikorwa w’Akarere ka Kicukiro yavuze ko ibyo byakozwe kugira ngo umuturage abone indege idasanzwe yanditseho amagambo ajyanye no kwirinda icyorezo cya COVID-19.

Ati “Turizera ko biza kumwibutsa uruhare rwe mu gukomeza kubahiriza amabwiriza, turimo turifashisha uburyo bwose butigeze bwifashishwa kugira ngo ubutumwa bwibutsa umuturage, yongere abone ko atari bwa buryo busanzwe nubwo nabwo tubukoresha ariko tukongeramo n’akarusho ku cyatubera umuyoboro wo kutwibutsa ko COVID-19 igihari kandi ko dusabwa kubahiriza amabwiriza yose.”

Umutesi Solange yakomeje avuga ko bafite n’ibindi bitakoreshejwe bazakomeza bifashisha kugira ngo umuturage atarambirwa cyangwa ngo amenyere imvugo imwe ngo irinde COVID-19, ko ahubwo uburyo bwose bushoboka bukangura amatsiko ye, bumwibutsa, bumwongereramo ikibatsi cyo kumva ko uruhare rwe rukenewe kugira ngo bahagarike COVID-19 buzakoreshwa.

Ubuyobozi bwa Kicukiro burasaba abaturage guha agaciro imbaraga ubuyobozi buri gushyiramo na bo bakubahiriza amabwiriza kugira ngo mbere na mbere ubuzima bubungabungwe ariko banarwanira ishyaka Akarere batuyemo.