Ku mugoroba wo kuri uyu wa Kane tariki ya 14 Ukwakira 2021, Leta y’Uburundi yavuye ku izima yakira inkingo za mbere za Covid-19, ni inkingo ibihumbi 500 zatanzwe n’igihugu cy’Ubushinwa nk’uko byemejwe na Minisitiri w’Ubuzima mu Burundi.
Izi nkingo zakiriwe na Minisitiri w’ubutegetsi bw’Igihugu, Ndirakobuca Gervais usanzwe ukuriye itsinda ryo kurwanya Covid-19 mu Burundi yari kumwe na Minisitiri w’Ubuzima muri kiriya gihugu Dr Thadee Ndikumana. Zahise zijyanwa mu kigo cy’igihugu gishinzwe inkingo.
Mu kwakira izi nkingo, Minisitiri w’Ubuzima, Thaddee Ndikumana yavuze ko abifuza gukingirwa Covid-19 batangira kwiyandikisha, ni mugihe umuntu wa mbere biteganyijwe ko azakingirwa mu cyumweru gitaha.
Dr Xavier CRESPIN uhagarariye OMS mu Burundi yavuze ko urukingo rwa Synopharm rwahawe u Burundi rwemewe ku isi yose.
Yagize ati ” Uru ni urukingo rwemejwe na OMS, ruremewe nk’izindi zose mwumva zivugwa mu kurwanya Covid-19.”
Yashimiye igihugu cy’Ubushinwa cyatanze izo nkingo n’igihugu cy’Uburundi cyemeye kuzakira nyuma y’igihe kitari gito kidakozwa ibyo gukingira abaturage Covid-19.
Ambasaderi w’Ubushinwa mu Burundi yatangaje ko izi nkingo zatanzwe mu rwego rwo gukomeza ubushuti n’umusanzu wo kurwanya icyorezo cya Covid-19.
Yagize ati “Perezida w’Ubushinwa yasezeranye gushyiraho urukingo ruzasangirwa n’isi yose, ibihugu bikennye cyane iby’Afurika nibyo bya mbere biruhabwa n’Uburundi burimo, iki cyorezo cyatweretse gufashanya.”
Dr Thadee Ndikumana yavuze ko abaturage bose bashaka gukingirwa Covid-19 bazatangira kwiyandikisha kuri uyu wa 15 Ukwakira 2021.
- Advertisement -
Ati ” Abaturage bose bifuza kubona urukingo ku bushake tugiye gufungura uzabishaka azaze kwiyandikisha kandi asinye urupapuro ko azirengera ingaruka.”
Yavuze ko bazahera ku bakora mu gisata cy’ubuvuzi bazifuza gukingirwa, abafite indwara zidakira, abarengeje imyaka 60 n’undi wese ubyifuza.
Mu mpera z’ukwezi kw’Ukwakira, Uburundi bwiteze kwakira izindi nkingo zizatangwa na Banki y’Isi.
Ukeneye kwamamaza! Gusobanuza! Gutanga amakuru? Hamagara 0788772818
NDEKEZI JOHNSON / UMUSEKE.RW
