Inkingo za Covid-19 ibihumbi 857 zahawe u Rwanda nk’impano y’Ubutaliyani

Ukeneye kwamamaza! Gusobanuza! Gutanga amakuru? Hamagara 0788772818

Ubutaliyani bwahaye u Rwanda inkunga y’inkingo za Covid-19 zisaga 857,000, aho zije zikurikira izisaga ibihumbi 153 zatanzwe n’Ubwongereza biciye mubufatanye bw’ibihugu bwo gusaranganya inkingo buzwi nka Covax.

Mu gitondo cyo kuri uyu wa Mbere, tariki 4 Ukwakira 2021, nibwo iz’inkingo zo mu bwoko bwa Astra-Zeneca ibihumbi 857 zakiriwe na Minisiteri y’Ubuzima zivuye mu Butaliyani, zikaba zakiriwe ku kibuga cy’indege mpuzamahanga cya Kanombe.

Izi nkingo zikaba zakiriwe na Sibomana Hassan, umukozi ushinzwe inkingo no kurwanya indwara zitandura muri Minisiteri y’Ubuzima ari kumwe na Amb. Guillaume Kavaruganda, Umuyobozi mukuru ushinzwe Uburayi, Amerika n’imiryango mpuzamahanga muri Minisiteri y’Ububanyi n’Ubutwererane mu Rwanda.

U Rwanda rukaba ruhagaze neza mu bihugu by’Afurika mu gutanga inkingo za Covid-19 ku baturage barwo, u Rwanda rukaba rumaze gukingira abantu barenga 25% by’abagomba gukingirwa nyamara ibihugu by’Afurika bikiri munsi 10%.

Imibare ngaruka munsi ya Minisiteri y’Ubuzima ku ishusho ya Covid-19 mu Rwanda, igaragaza ko kugeza tariki ya 3 Ukwakira 2021, abantu 2,131,766 bari bamaze gukingirwa Covid-19, naho abasaga 1,680,361 nibo bamze gukingirwa byuzuye.

Mu Mujyi wa Kigali abarenga 90% bafite hejuru y’imyaka 18 bamaze guhabwa urukingo rwa Covid-19. Mu gihugu hose abantu bafite imyaka iri hejuru ya 18 bamaze gukingirwa ku kigero kiri hejuru ya 25%.

Intego y’u Rwanda ni ukuba yakingiye 30% by’abagomba gukingirwa bitarenze mu mpera z’uyu mwaka. Naho intego ikaba kuba hakingiwe abaturarwanda bangana na miliyoni 7.8, bangana na 60% by’abagomba gukingirwa.

Inama y’Abaminisitiri yateranye tariki 21 Nzeri, yoroheje ingamba zo kwirinda Covid-19, aho utubari twafunguwe nyuma y’amezi 18 dufunze, ni mu gihe amasaha yo gutaha mu Mujyi wa Kigali yashyizwe saa tanu z’ijoro(11:00pm).

U Rwanda rukaba ruherutse gushimwa n’Ishami ry’Umuryango w’Abibumbye ryita ku buzima OMS, kubera kwesa umuhigo wo kuba nibura buri gihugu kimaze gukingira 10% ku baturage bacyo.