Sadate Munyakazi wayoboye Rayon Sports mu bihe bigoye yagenewe impano

Munyakazi Sadate wabaye Perezida wa Rayon Sports, yagaragaje ibyishimo bisendereye yatewe n’impano yahawe n’abakunzi b’iyi kipe bari kumwe na Perezida wayo, Uwayezu Jean Fidele.

Mukazi Sadate yavuze ko yishimiye impano yahawe

Sadate kuri Twitter ye, yashyizeho amafoto agaragara yishimanye na bamwe mu bafana mbere bamwotsaga igitutu ngo yegure ku buyobozi bwa Rayon Sports, ubu bamushimiraga ko yazanye impinduka mu ikipe.

Ubu butumwa bugira buti “Byari iteka n’agaciro kenshi kubana n’inshuti, abavandimwe n’inkoramutima ku munsi w’ejo. Nishimiye kandi ku mpano nziza mwangeneye nk’ishimwe kuri byinshi twakoreye Umuryango wa Rayon. Dushimiye kandi Perezida wa Rayon Sports wabanye natwe.”

Munyakazi Sadate yayoboye ikipe ya Rayon Sports mu bihe bigoye aho bamwe mu bakunzi b’iyi kipe batahwemye kumuvuga nabi bamushinja kubasenyera ikipe bakamara igihe kinini bamusaba kwegura.

Uyu mugabo ukunze kuvuga ko iteka aharanira icyateza imbere ikipe ya Rayon, yavugaga ko ibyo yakoraga icyo gihe byari binyuze mu mucyo cyane ku buryo abamurwanyaga ahubwo ari abatarifuzaga ineza iyi kipe.

Abafana ba Gikundiro bari kumwe na Perezida wa Rayon Sports, Uwayezu Jean Fidele bahaye Sadate ishusho iriho ifoteye ye ishushanyije.

Nubwo bamwe bakamiraga Munyakazi Sadate mu kitoze, kuri twitter Abazimana Steven yamwandikiye amubwira ko azamugwa inyuma ndetse ko yizeye ko hari ubwo azongera kuyobora Rayon Sports.

Ati “Bakwange nkukunde, bakurwanye nzakurwanirira, bakuvuge nabi nkuvuge neza, nizera ko “one day” uzayobora Gikundiro, twe tureba kure tuzi inzira wari urimo ko ari iyanyayo, nakwigiyeho byinshi courage.”

Ubu butumwa bwanyuze amatwi ya Munyakazi Sadate, ati “Orararara! Ubyukiye kuri message nk’iyi ni iki kindi arenzaho uretse kwirirwana umutima wuzuye amashimwe. Gusa urakoze cyane.”

- Advertisement -

Urwego rw’Igihugu rw’Imiyoborere (RGB) rwahagaritse komite nyobozi ya Rayon bitewe n’ibibazo byari mu ikipe. Munyakazi Sadate wayoboraga iyi kipe kuva muri 2017, asabwa kwegura we na Komite ye, tariki ya 22 Nzeri 2019.