U Rwanda rwakiriye inkingo za Covid-19 ibihumbi 300 zatanzwe n’u Bushinwa

U Bushinwa bwahaye inkuga y’inkingo za Covid-19 zisaga ibihumbi 300 zo mu bwoko Sinopharm, ni inkingo zije gufasha ku gera ku ntego u Rwanda rwihaye yo gukingira 40% by’abaturage mbere y’uko uyu mwaka urangira.

Inkingo zahawe u Rwanda akaba ari iza Sinopharm zikorwa n’u Bushinwa

Kuri iki Cyumweru, tariki 7 Ugushyngo 2021, nibwo izi nkingo 300,000 za Sinopharm zagejejwe ku kibuga cy’indege mpuzamahanga cya Kanombe zivanywe muri Repubulika y’u Bushinwa.

Zakiriwe n’Umuyobozi w’Ishami rishinzwe indwara mu Ikigo cy’igihugu gishinzwe ubuzima (RBC), Dr. Albert Tuyishime ari kumwe n’Amabasaderi w’u Bushinwa mu Rwanda, Rao Hongwei.

Uyu muyobozi muri RBC yavuze ko ubushobozi bwo kujyana ziriya nkingo mu Ntara buhari, ngo igikurikiraho bavugana n’Uturere bitewe n’uko Covid-19 ihagaze, ubundi bakazihageza bagahita banaziha abaturage.

Asaba abaturage gukoemza kwitabira guhabwa inkingo.

U Rwanda rurakataje mu bikorwa byo gukingira Abanyarwanda, kugeza ubu imibare ya Minisiteri y’Ubuzima ya tariki 7 Ugushyingo 2021, igaragaza ko abantu basaga 4,370,218 bari bamaze guhabwa urukingo rwa Covid-19 doze ya mbere. Ni mu gihe abandi barenga miliyoni ebyiri bari bamaze gukingirwa inkingo ziteganyijwe uko ari ebyiri.

Nubwo itangwa ry’inkingo rikomeje kujya mbere, inzego z’ubuzima mu Rwanda ziherutse gutangaza ko hari gukorwa ubushakashatsi ku bantu b’ibyiciro byihari nk’abageze mu za bukuru n’abafite indwara zidakira ngo harebwe niba ubudahangarwa umubiri wabo wakuye mu guhabwa inkingo ebyiri buhagije cyangwa se bazahabwe doze ya gatatu.

U Bushinwa si ubwa mbere buhaye inkunga y’inkingo u Rwanda kuko no muri Kanama uyu mwaka, iki gihugu cyari cyatanze doze ibihumbi 200 za Sinopharm.

Urukingo rwa Sinopharm rukaba rukorwa n’u Bushinwa, OMS igaragaza ko mu bushakashatsi yakoze ku bantu batandukanye, byagaragaye ko uru rukingo rushobora kurinda umuntu kugaragaza ibimenyetso bya SARS-CoV-2 Virus itera Covid-19 ku kigero cya 79%.

- Advertisement -

Gusa ibi ni nako bihagaze mu kurinda uwanduye iki cyorezo kuba yarembya na cyo. Ubu bwirinzi umuntu abugira guhera ku minsi 14 kuzamura uhereye igihe yaboneye urukingo rwa kabiri.

Izi nkingo u Rwanda rukomeje kwakira zikaba zikomeje kugaragaza umusanzu ukomeye mu gucogora kwa Covid-19, ibi bigaragazwa nuko mu minsi irindwi ishize igipimo ku bandura bashya cyari kuri 0.3%. gusa inzego z’ubuzima mu Rwanda zikomeza gushishikariza abantu kutirara ngo badohoke ku kwirinda iki cyorezo kuko kigihari.