Abasaga 10.000 bamaze guhabwa urukingo rwa Gatatu

Minisiteri y’ubuzima yatangaje ko abantu bangana 10.985 bamaze guhabwa urukingo rushimangira hagamijwe gukomeza kwirinda icyorezo cya COVID-19.

Muri uku kwezi kwa Ukuboza 2021,Minisiteri y’Ubuzima yafashe icyemezo cyo gutangira gutanga urukingo rwa Gatatu ku bantu bari hejuru y’imyaka 50, abafite indwara zidakira,abakozi bo kwa muganga, abahura n’abantu benshi ndetse n’abandi bamaze amezi atandatu bahawe inkingo ebyiri za COVID-19 hagamije kongera ubudahangarwa bw’umubiri.

Umunyamabanga wa leta muri Ministeri y’Ubuzima ,Dr Mpunga Tharicisse,yabwiye Radiyo Rwanda ko kugeza ubu ubwitabwire bw’abahabwa urukingo rushimangira bukiri hasi, asaba abantu kwikingiza.

Ati “Tumaze kugira abantu bagera mu bihumbi cumi bamaze gukingirwa ariko umubare uracyari hasi ugereranyije nuwo duteganya,tukaba twakangurira iyi gahunda yo kwikingiza ari benshi.”

Dr Mpunga Tharicisse yavuze ko kuba ubwitabire bukiri hasi ahanini biri guterwa n’ubukangurambaga mu kwitabira urukingo rushimangira butaragera ku kigero gishimishije gusa yizeza ko hazakomeza gushyirwamo imbaraga.

Umunyambanga wa Leta muri Minisiteri y’Ubuzima yavuze ko kuba abantu badakwiye kugira mpungenge z’uko bahabwa inkingo z’ubwoko butandukanye kuko byose biri gukorwa kugira hongerwa ubudahangarwa bw’umubiri kugira ngo ubashe guhangana na virus yihinduranyije.

Ati “Ubushakashatsi bwagaragaje ko izi nkingo kuzivanga ntacyo bitwaye kandi ko n’abazihawe bituma bagira abasirikare benshi mu mubiri.Ubu rero inkingo turigutanga ni iza moderna,ni kimwe n’urwa Pfizer uruhawe ntacyo rwamutwara kuko biri mu bwoko bumwe.”

Yakomje ati “ Icyo dusaba cyane abanyarwanda ni ukwikingiza kugira ngo tube twagira ubudahangarwa buhanga n’izi virus n’uburyo zihinduranya.Abikingije urukingo rwa mbere, turabakangurira gufata urwa kabiri, n’abo turi guha urukingo rushimangira bageze igihe cyo kurufata ko bakwihutira ku rufata kugira ngo bongere ubudahangarwa bw’umubiri wabo kugira ngo duhangane n’iyi virus.”

Minisiteri y’Ubuzima itangaza ko kugeza ubu ubwoko bushya bwa virus ya Corona bwiswe Omicron butaragera mu Rwanda gusa ko hashyizweho ingamba zitandukanye ziyikumira, igasaba abantu kubahiriza ingamba n’amabwiriza yose yashyizweho yo kwirinda icyorezo cya Coronavirus.

Muri rusange Minisiteri y’Ubuzima itangaza ko abanyarwanda bamaze gufata urukingo rwa mbere rwa COVID-19 bangana na 45,622.Ni mu gihe abahawe inkingo ebyiri bo bangana na 3,800,373 .

TUYISHIMIRE RAYMOND  / UMUSEKE.RW