West Coast Awards, ibihembo bishya by’abahanzi b’Iburengerazuba bigiye gutangizwa

Mu minsi ya vuba mu Ntara y’Iburengerazuba hagiye gutangizwa ibihembo bishya bizahabwa abahanzi n’abafite aho bahuriye n’imyidagaduro bitwaye neza muri uyu mwaka wa 2021.

Ibi bihembo byiswe “West Coast Awards” byatekerejweho n’Itsinda ry’abakunzi b’umuziki muri iriya Ntara, ni mu rwego rwo guha agaciro abahanzi baho ndetse n’abitangira iterambere ry’imyidagaduro, bazashimirwa mu ruhame.

Amakuru yizewe UMUSEKE wahawe na Habineza Deo usanzwe ari umunyamakuru wa RBA ishami rya Rusizi, akaba umuvugizi w’ibi bihembo ni uko bizaba bifite umwihariko ugereranyije n’ibisanzwe bitangirwa mu Ntara y’Iburengerazuba.

Yagize ati “Uturere twose tugize Intara y’Iburengerazuba abakoze neza uyu mwaka bazashimirwa mu byiciro bitandukanye, bazahabwa ishimwe rikomeye.”

Akomeza agira ati “Amakuru arambuye ku itangwa ry’ibi bihembo azatangazwa muri iyi weekend ubwo hazajya hanze abazabihatanira”

“West Cosat Awards” ni ibihembo birimo amavugurura menshi ugereranyije n’ibisanzwe mu muziki mu Ntara y’Iburengerazuba.

UMUSEKE wamenye ko usibye ibihembo bizatangwa, abazabihabwa bashobora no gufumbatizwa amafaranga yo kubiherekeza.

Ibyiciro bizahembwa muri “West Coast Awards” ntibiramenyekana.

Mu gutoranya abahanzi bazitabira ibi bihembo, bazatoranywa n’abanyamakuru bakora ibijyanye n’imyidagaduro mu Turere 7 tugize Intara y’Iburengerazuba “Bari gutanga amakuru ku bantu bazajya mu byiciro bizahembwa.”

Deo Habineza ati “Ikintu kitiriwe Intara ntikiba gikwiriye gusebya Intara niyo mpamvu umuhanzi uzagera kuri finale hari byinshi byatekerejweho azahabwa.”

Abategura ibi bihembo bavuga ko bari kuvugana n’Uturere kugira ngo babafashe guhesha agaciro ibikorwa by’abahanzi.

West Coast Awards igiye kwiyongera mu bindi bihembo bisanzwe bitangirwa mu Ntara y’Iburengerazuba. Ni nyuma ya Kivu Awards iheruka mu mwaka wa 2019 na Bugoyi Side &El Classico Awards yo mu Karere ka Rubavu byitezwe ko umwaka utaha izagera ku rwego rw’Intara.

Ibihembo bya “West Coast Awards” bizatangwa mu mpera z’Ukuboza 2021, ababyegukanye bazahemberwa muri kamwe mu Karere kazatangazwa n’abari kubitegura.

Ukeneye kwamamaza! Gusobanuza! Gutanga amakuru? Hamagara 0788772818

NDEKEZI JOHNSON / UMUSEKE.RW